QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysy aıasynda jańa formatta ótken Ulttyq biryńǵaı testileý men TjKB bilim alýshylarynyń Keshendik testileýiniń qorytyndylary qaraldy, dep jazady Qamshy.kz aqparat agenttigi Premer-mınıstrdiń baspasóz qyzmetine silteme jasap. 

QR bilim jáne ǵylym mınıstri Erlan Saǵadıev bıyl UBT-nyń jańa format boıynsha júrgizilgenin jáne eki rásimge: mektepterdegi bitirý emtıhandary sekildi qorytyndy atestattaý jáne JOO-na qabyldaý emtıhanyna bólingenin atap ótti. Bul format Japonıanyń, Izraıldiń jáne AQSH-tyń halyqalaryq tájirıbesin taldaý nátıjesinde ázirlengen. 

Aıta ketý kerek, UBT-nyń mazmundyq bóliminde logıkalyq oılaý deńgeıin, bazalyq quzyretti jáne ári qaraı oqýǵa degen qabilettilikti, ıaǵnı fýnksıonaldyq saýattylyqty anyqtaýǵa baǵdarlanǵan testiler boldy.

Budan ózge, bıyl alǵash ret testileýdiń onlaın-taratylymy iske qosyldy. Bul barlyq nıet bildirgenderge Qazaqstannyń kez kelgen jerinen testileý úderisin baqylaýǵa múmkindik berdi, sáıkesinshe buzýshylyqtardyń sanyn tómendetti.

Jalpy UBT-ǵa 88 595 adam qatysty, bul ótinim bergenderdiń 95% qurady. Testileý qorytyndysyna sáıkes respýblıka boıynsha ortasha bal 140-tyń 80,5-in qurady. Ótken jyly bul kórsetkish 125-tiń 81-in quraǵan bolatyn. 50 baldan turatyn mejelik deńgeıden 74 517 túlek asty, bul 84%-dy qurady.

Keshendik testileý 17-23 shilde aralyǵynda joǵarǵy oqý oryndarynyń 48 pýnktinde ótti. Oǵan qatysýǵa 54 649 ótinim berildi, is júzinde testileýge 50 416 adam qatysty. 50 baldan turatyn mejelik deńgeıden 21 078 adam nemese túlekterdiń jalpy sanynyń 42% asty.

Mejelik deńgeıden ótpegender testileýden qaıtadan óte alady. Qujattardy qabyldaý 1-8 tamyz aralyǵynda, al testileý – 19-24 tamyz aralyǵynda ótedi. Mejelik deńgeıden ekinshi rette de ótpeı qalǵan jaǵdaıda JOO-ǵa bir semestrge aqyly negizde oqýǵa múmkindik beriledi.