Almatyda qala ákimdigi janyndaǵy múgedekterdi áleýmettik qorǵaý jónindegi Úılestirý keńesiniń otyrysy ótti, dep habarlaıdy Qamshy.kz aqparat agenttigi.

Jıyn barysynda halyqtyń utqyr toptarynyń áleýmettik jáne kóliktik ınfraqurylym nysandaryna beıimdelý máselesi, ınklúzıvti bilim berýdiń problemasy talqylandy.

Qalalyq Jumyspen qamtý jáne áleýmettik baǵdarlamalar basqarmasynyń basshysy Aıgúl Ahmetova eger 2016 jyly áleýmettik qoldaýǵa múmkindigi shekteýli 13 myń adam qamtylyp, olarǵa 2,1 mlrd. teńgeniń kómegi kórsetilse, bıylǵy 2017 jyly 22 myńnan astam azamatqa áleýmettik qoldaý kórsetý úshin 4,1 mlrd. teńgeniń bólingenin aıtyp ótti.

«Ótken jyly artyǵymen bólingen qarjynyń arqasynda alǵash ret qosymsha joǵary sapaly tehnıkalyq buıymdar satyp alynyp, múgedekterge kórsetilgen áleýmettik kómektiń aıasy ulǵaıdy. 2017 jyly 836 múmkindigi shekteýli adam úshin Germanıa men Polshadan quny 200 mıllıon teńgeden asatyn 958 oryndyq-arba satyp alyndy. Quny 593 mln. teńge bolatyn 2543 zamanaýı sýrdo-tıflotehnıkalyq buıym satyp alynyp, 2 myńnan astam adamǵa taratyldy. Sonymen qatar baǵdarlamalarmen jáne daýys sıntezimen jabdyqtalǵan noýtbýkter, oqý mashınalary da alyndy. 2012 jyldan beri kezekte turǵan múgedekterdiń barlyǵy qajetti jabdyqtarmen tolyq qamtylady», - dedi Aıgúl Ahmetova.

Mamandardyń aıtýynsha, búgingi kúni Almatyda erekshe kútimdi qajet etetin 36 bala bes mektepte bilim alsa, 17 baldyrǵan úsh balabaqshada tárbılenýde, 276 stýdent úsh oqý ornynda dáris alýda. 36 mektepte myńnan astam balany qamtyǵan korreksıalyq - damý synyptary bar, psıhologıalyq- pedagogıkalyq korreksıanyń 7 kabınet jumys isteıdi, bularda 877 balaǵa kómek kórsetildi, 5588 baldyrǵan psıhologıalyq-medısınalyq konsýltasıada tekserýden ótti.

Bıyl mamyrda erekshe bilim berýdi qajet etetin balalar úshin ınklúzıvti kásibı bilimniń resýrstyq ortalyǵy ashyldy. Munda jyl aıaǵyna deıin 500 múgedek bilim alyp shyǵatyn boldy.

Qala ákimi bólingen qarjynyń ashyqtyǵy men tıimdiligin qamtamasyz etýdi tapsyrdy.

«Ómir bir - aq ret beriledi, tek ýáde berýmen ǵana shektelmeı, máseleni birden qolǵa alyp, birden sheshý qajet», - dedi B.Baıbek.