QR Parlamenti Senatynyń depýtaty Dınar Nóketaeva Qyzdar ýnıversıtetiniń «Qurmetti profesory» ataǵymen marapattaldy, dep habarlaıdy Qamshy.kz aqparat agenttigi. Bul jaıynda atalǵan JOO-nyń medıaqyzmetinde málim boldy.

«Qyzdar ýnıversıtetinde ótken Ǵylymı keńestiń kezekti jınalysynda Qyzdar ýnıversıtetiniń burynǵy rektory Dınar Nóketaeva oqý ornynyń «Qurmetti profesory» ataǵymen marapattaldy. 6 jyldan asa ýaqyt oqý ornyna basshylyq etken Dınar Nóketaeva ózine kórsetilgen zor qoshemetke alǵysyn bildirip, ujymmen qoshtasty», - delingen habarlamada.

Atap óte keteıik, Qyzdar ýnıversıtetiniń rektory Dınar Nóketaeva 28 maýsym kúni Almaty qalasy boıynsha ótken saılaýda 32 prosent daýyspen jeńiske jetip, QR Parlamenti Senatynyń depýtattyǵyna saılanǵan bolatyn.

Ortalyq saılaý komısıasynyń málimetinshe, senatorlyqqa barlyǵy 89 úmitker usynylǵan. Saılaý barysyn 518 halyqaralyq jáne otandyq baıqaýshy, 244 qazaqstandyq jáne sheteldik BAQ ókilderi qadaǵalaǵan. Atap ótetin jaıt, buǵan deıin Májilis depýtaty bolǵan Dınar Nóketaeva bıyl saılanǵan Senat depýtattary ishindegi jalǵyz áıel.

«6 jyl boıy Sizdermen qoıan-qoltyq, birlikte, berekede jumys istegenime qýanyshtymyn. Qyzdar ýnıversıteti ustaz-pedagogtardy daıyndaıtyn, Qazaqstan ǵylymy men bilimi salasynda ózindik qaıtalanbaıtyn bolmys-bitimi bar oqý orny. Qasıetti qara shańyraqty óz daralyǵymen, biregeıligimen erekshelenetindigin qashanda aıtyp júremin. Ony sózben emes, ispen de dáleldep kelemiz», - dedi D.Nóketaeva.