El Prezıdenti N.Nazarbaev óziniń strategıalyq mańyzǵa ıe «Bolashaqqa baǵdar: rýhanı jańǵyrý» baǵdarlamasynda aýqymdy máselelerge nazar aýdarǵany belgili. Elimizdiń erteńgi baǵyt-baǵdary aıqyndalǵan Memleket basshysynyń oıtolǵamy eshkimdi de beı-jaı qaldyrmaı, elimizde «Rýhanı jańǵyrý» qoǵamdyq sanany jańǵyrtý baǵdarlamasyn júzege asyrý jumystary keńinen júrgizilýde. Batys Qazaqstan oblysynda «Rýhanı jańǵyrý» baǵdarlamasynyń óńirlik joba keńsesi óz jumysyna kirisýde.

          Oblys ákimdigi ǵımaratynda ornalasqan óńirlik joba keńsesi «Rýhanı jańǵyrý» baǵdarlamasy boıynsha qolǵa alynǵan sharalardy jınaqtap, oblys kóleminde iske asyrýda. Keńse jetekshisi – eń jas oblystyq depýtat Saltanat Tumanbaeva. Óńirlik jobalyq keńse ortalyǵy  jergilikti atqarýshy organdarmen jumysty úılestirý jáne baǵdarlamanyń jobalaryn ilgeriletý úshin qurylǵan. Sondaı-aq, oblysta «Rýhanı jańǵyrý» baǵdarlamasyn iske asyrý boıynsha sarapshylar keńesi qurylyp, aýdandarda jumys toby jasaqtalmaq.

«Rýhanı jańǵyrý» baǵdarlamasy aıasynda jańa, tyń jobalar jasaqtaý – basty mindet. Memleket basshysynyń qoıǵan maqsat-mindeti de osyndaı: «Jańa jaǵdaıda jańǵyrýǵa degen ishki umtylys – bizdiń damýymyzdyń eń basty qaǵıdasy. Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi» degen bolatyn Elbasy óz maqalasynda.

Óńirimizde Jantas Safýllınniń jetekshiligimen birneshe jyldar boıy epıgrafıkalyq eskertkishterdi zerttep júrgen «Qulpytas syryn ashaıyq», óńirimizdiń tarıhı, kıeli oryndary jóninde beınerolıkter túsirip júrgen «Deshti Qypshaq dalasy», Reseı muraǵattaryndaǵy tarıhı derekterdi jınaqtaý  jobalary osy baǵdarlamanyń aıasyna dóp keledi.

Alashtyń 100 jyldyǵymen qatar kelgen oblystyq «Oral óńiri» men «Prıýrale» gazetterine 100 jyl tolýyna oraı «Jaıyq Pres» JSHS-da biraz is tyndyryldy. «Oral óńiri» gazetiniń bastaýynda turǵan «Qazaqstan», «Uran», «Izvestıa-Habar», «Kırgızskaıa pravda» - «Qazaq durystyǵy», «Durystyq joly», «Ushqyn» (respýblıkalyq «Egemen Qazaqstan» gazetiniń bastaýy) gazetteri de jınaqtalyp, jeke kitap bolyp jaryq kórdi. Sońǵy bes jyl ishindegi oblystyń baspasóz tarıhy týraly on kitap jaryq kórdi. Oǵan qosa gazetterdiń 100 jyldyq tigindisi de baspasózdiń qara shańyraǵyna jınaqtaldy. Olardyń elektrondyq nusqalary Elbasynyń «Sıfrlyq Qazaqstan» jobasymen tolyq úndesedi.

«Rýhanı jańǵyrý» baǵdarlamasyn júzege asyrýǵa baǵyttalǵan sharalar qataryn  «Jaıyq Pres» JSHS bas dırektory J.Safýllın: «Baspasóz tarıhyna qatysty tulǵalardyń kóne sýretteri jınaqtalýda. Bashqurtstan muraǵattarynda HİH ǵasyrda qazaq meshitterinde toltyrylǵan metrkeleri saqtalǵan. Bul qujattar sol kezeńge tarıhı saraptama jasaýǵa negiz boldy. Árıne tarıhı eskertkishterdegi, muraǵattardaǵy málimetterdi jınaý ońaı sharýa emes. Oǵan mamandar tartylýy qajet. Osy bastalǵan ǵylymı jumystardy jalǵastyrý úshin «Rýhanı jańǵyrý» baǵdarlamasynyń «Týǵan jer» baǵytyna 6 joba usynyldy»,- dep tolyqtyrdy.

Batys Qazaqstan oblysynyń ishki saıasat basqarmasy «Týǵan jer» kishi baǵdarlamasy aıasynda oblystaǵy 12 aýdanǵa pres-týrlar uıymdastyrmaq. Árbir aýdannyń kórikti jáne kıeli jerleri, óńirdiń damýyna úles qosqan azamattar týraly BAQ-qa materıaldar shyǵarý kózdelýde. Sondaı-aq, «Jyldyń úzdik mesenaty», «Jyldyń úzdik volonteri», «Jyldyń úzdik ÚEU», «Jomart júrek» atty sharalar men «Qoǵamdyq-pikirtalas klýbynyń» otyrystary ótkizilip, «Áleýmettik-mańyzdy jobalar men ıdeıalardyń jármeńkesi» jáne ólketaný boıynsha onlaın oqytýlary uıymdastyrylmaq.

Shekaralyq yntymaqtastyqty nyǵaıtý maqsatynda kórshiles Reseı oblystarynyń etno-mádenı ortalyqtarynyń qatysýymen «Dostyqta shekara joq» festıvali josparlandy.