Din isteri jáne azamattyq qoǵam mınıstri Nurlan Ermekbaev Mysyrda ustalǵan qazaqstandyq stýdentterge qatysty  pikir bildirip, qazaqstandyqtardy shetelge oqýǵa resmı joldamasyz barmaýǵa shaqyrdy. Astanada beısenbide jýrnalısermen kezdesken Ermekbaev shetelge "kúmándi" oqý oryndarynda dinı bilim alýǵa ketkendermen bılik jumys isteıtinin de aıtty, dep habarlaıdy Qamshy.kz aqparat agenttigi Azattyq radıosyna silteme jasap.

"Qazaqstan musylmandary dinı basqarmasynyń (QMDB) joldamasynsyz dinı bilim alyp, QMDB qurylymyna jumysqa ornalasýǵa bolmaıdy" dedi mınıstr.

Mysyrda birge páter jaldap turyp jatqan alty qazaqstandyq 20 shildeden beri baılanysqa shyqpaǵan. 25 shildede mınıstrlik olardy polısıa ustaǵanyn habarlaǵan.

Al 2 tamyzda Egıpette qamaýda otyrǵan qazaqstandyq alty stýdenttiń Qazaqstanǵa deportasıalanatyny habarlanǵan. Bılik olardyń ne sebepti ustalǵanyn aıtpaı otyr. Buǵan deıin Qazaqstan syrtqy ister mınıstrliginiń baspasóz hatshysy Ánýar Jaınaqov bılik ustalǵan qazaqstandyqtardy ekstremıster dep sanamaıtynyn aıtqan.

Resmı málimet boıynsha, qazir shetelderde birneshe júz qazaqstandyq dinı bilim alyp jatyr. Bıliktiń dereginshe, sońǵy birneshe jylda Qazaqstannyń júzdegen azamaty Sırıa men Iraktaǵy ekstremıstik toptar qataryna qosylǵan.