Memleket basshysynyń tapsyrmasymen QR Premer-mınıstri Baqytjan Saǵyntaev jumys saparymen Aqmola oblysyna bardy, onda «Qazaqstannyń úshinshi jańǵyrýy: jahandyq básekege qabilettilik» Joldaýy men Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy mindetterdi iske asyrý barysymen tanysady dep habarlaıdy Qamshy.kz aqparat agenttigi QR Premer-mınıstiriniń baspasóz qyzmetine silteme jasaı otyryp.

Óńirge barǵan Baqytjan Saǵyntaev birinshi kezekte «Esil Agro» JSHS sút-taýar fermasy men egis alqaptaryn aralady, onda aýyl sharýashylyǵy óndirisiniń tehnologıalyq erekshelikterimen jáne kásiporyndy odan ári damytý keleshegimen tanysty.  

Baqytjan Saǵyntaev sút fermasyn aralaý kezinde kásiporynnyń óndiristik úderisterimen jáne daıyn ónimder kórmesimen tanysty. QR Premer-mınıstrine munda óndiristik qýattylyqty 2 esege deıin ulǵaıtý jáne saýyn tabynyn 2 400 basqa deıin jetkizý kózdelip otyrǵany týraly aqparat berildi. 

Budan keıin Baqytjan Saǵyntaev «Esil Agro» JSHS egistiginde boldy, onda Aqmola oblysynyń aýyl sharýashylyǵy basqarmasynyń basshysy Murat Balpannyń egin jaǵdaıy týraly baıandamasyn tyńdady. 

Aıta ketý kerek, QR Prezıdenti N. Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýyna sáıkes osyndaı kásiporyndardy ashý elimizde ekonomıkalyq ósimniń jańa modelin qalyptasyrý kezinde mańyzdy baǵyttardyń birine aınalýy tıis. Osyǵan oraı, búgingi kúni AÓK damytýdyń 2017-2021 jyldarǵa arnalǵan memlekettik baǵdarlamasy aıasynda otandyq aýyl sharýashylyǵy óndirýshilerine keshendik qoldaý kórsetilip jatyr. Onda jeńildikpen nesıelendirý men qoldaý kórsetýdiń ózge de tetikteri qarastyrylǵan. 

Búgin Baqytjan Saǵyntaev óndiristik jáne aýyl sharýashylyǵy kásiporyndarynyń, sport jáne týrısik ınfraqurylym nysandarynyń jumysymen tanysady, olardyń ishinde «Esil-Agro» JSHS, «Tynys» AQ, Shýchınsk qalasynyń shańǵy sportynyń respýblıkalyq bazasy, sondaı-aq Býrabaı aýylynyń týrısik nysandary bar.   

QR Premer-mınıstri Shýchınsk-Býrabaı kýrorttyq aımaǵyn damytý máseleleri jóninde keńes, «Atameken» Kásipkerler palatasynyń óńirlik keńesiniń múshelerimen kezdesý, sondaı-aq Ónimdi jumyspen qamtý jáne jappaı kásipkerlik baǵdarlamasy men «Cerpin» áleýmettik jobasyn iske asyrý týraly keńes ótkizedi dep kútilýde.

Budan ózge, Baqytjan Saǵyntaev Kókshetaý qalasynyń Jumyspen qamtý ortalyǵynyń jumysymen jáne «Shýchınsk – Býrabaı» avtojolyn jóndeý sapasymen tanysady.