Sh.Aımanov atyndaǵy «Qazaqfılm» kınostýdıasynda rejıser Tólegen Baıtúkenovtyń «Shala qazaq» atty (shartty ataýy) tolyqmetrajdy kórkem fılmniń qorǵalymy ótti. Qazaqstan Respýblıkasy Mádenıet jáne sport mınıstrligi tapsyrysy boıynsha túsirgeli jatqan kınotýyndy qylmyskerlermen  kúreske túsken aýyldyń ýchaskelik polıseıi týraly baıandaıdy.

– Bul fılm adamnyń taǵdyry men mindettelgen paryzyn oryndaý týraly. Kartınanyń jelisinde adam tabıǵatyna tán ynjyqtyq pen azǵyndaýǵa qumartyp turatyn qasıeti bolsa-daǵy, oǵan boı aldyrmaı, óz tańdaýyna jáne óziniń azamattyq boryshyna adal bolyp qalǵan jannyń ómiri kórsetiledi, – dedi fılmniń qoıýshy rejıseri Tólegen Baıtúkenov.

Aıta ketsek, «Shala qazaq» fılmi rejıserdiń jeke ózi túsirgeli jatqan alǵashqy jumysy. 2011 jyly ol «Qazaqfılm» kınostýdıasynda jaryqqa shyqqan «Sýper Baha» atty komedıanyń senarıin jazýǵa atsalysyp, fılmniń teń rejıseri boldy. Keıin Tólegen Baıtúkenov kınostýdıanyń «Debút» shyǵarmashylyq-óndiristik birlestiginde «Tushpara jáne Rahmanınov» atty qysqametrajdy fılm túsirgen. Bul fılmniń senarıin de avtordyń ózi jazǵan.

Aıta ketsek, atalǵan jobanyń qorǵalymyna elimizdiń tanymal kınematografısteri  qatysty, olardyń qatarynda kınostýdıanyń «Kórkem fılmder» shyǵarmashylyq-óndiristik birlestiginiń jetekshisi, belgili kınorejısser Satybaldy Narymbetov ta boldy. Ol fılmniń senarıi birshama ózgergenin jáne ony jazýda biraz jumys atqarylǵandyǵyn baıqaǵanyn aıtyp, kásibı kınogerlerden quralǵan shyǵarmashylyq topqa sáttilik tiledi.

Fılmde basty rólderdi Aqylhan Asylov, Dına Tasbolatova, Shyńǵys  Kapın syndy jas akterler somdaıdy. «Shala qazaq» fılminiń ekshn-qoıylymdaryn júzege asyrý úshin Bahodyr Jalmetov bastaǵan «Jal» atty kaskaderlyq asosıasıasynyń toby tartylǵan.

Fılmniń túsirý jumystary ústimizdegi jyly 10 tamyzda bastalady. Rejıserdiń aıtýyna qaraǵanda kartınanyń túsirý jumystary bir aımaqta – Almaty oblysy Qapshaǵaı qalasynan 40 shaqyrym jerde ornalasqan Brıgadır aýylynda ótedi.

Fılm týraly: Órkenıetten tys qalǵan aýyldyń birinde ýchaskelik polıseı aýyldy basyp alǵan qylmyskerlermen kúreske túsedi. Urlanǵan qundy zattarǵa toly júk kóligi osy aýylda synyp qalǵandyqtan, qylmyskerler júk qoımasyn izdep, osy aýylda toqtaýǵa májbúr bolady. Olar eki kúnniń ishinde jerge kómilgen baǵaly júkterin qazyp alyp,eshkimge zıan keltirmeı aýyldan qashyp ketýdi kózdeıdi. Alaıda qylmyskerlerdiń bul josparlary iske aspaı qalyp, aýyl turǵyndaryna kúsh jumsaıdy. Tek aýyldyń ýchaskelik polıseıi qylmyskerlerge tótep berip, óziniń boryshyn sońyna deıin óteıdi.

Janry: vestern, drama, boevık

Qoıýshy rejıser: Tólegen Baıtúkenov

Senarı avtorlary: Tólegen Baıtúkenov, Inna Muqasheva, Andreı Ten

Qoıýshy operator: Aleksandr Rýbanov

Qoıýshy sýretshi: BerikbolSHashýbaev

Dybys rejıseri: Ilá Korobeınıkov

Atqarýshy prodúser: Ádil Qojabergenov

Prodúseri: Shynar Bóribaeva

Rólderde:AqylhanAsylov, Dına Tasbolatova, Shyńǵys Kapın, Erkebulan Tasynov, Erjan Núsipaqynov, Sálim Balǵazın, Marat Inerbaevjáne basqalary.

Rejıser týraly anyqtama: Baıtúkenov Tólegen– senarıst, rejıser, jýrnalıs, kınosynshy, Qazaqstan kınosynshylar asosıasıasynyń múshesi. 2014 jyly T.Júrgenov atyndaǵy óner akademıasynyń Joǵarǵy rejıserlar kýrsyn «Kıno rejısýrasy» mamandyǵy boıynsha támamdaǵan.

A.A. Eshpaı jáne V.A. Fenchenkonyń sheberhanasynda dáris alǵan.

Fılmografıasy: «SýperBaha» atty komıks-komedıanyń senarıin jazýǵa qatysqan, sonymen qatar teń rejıseri (Qazaqfılm, 2011), «Basqalar» qysqametrajdy fılmniń senarı avtory jáne rejıseri (2014), «Ómir synaǵy»serıalynyń ıdeıa jáne senarı avtory.