Fın ǵalymdary aýadan alynatyn sý men kómirqyshqyldan jeýge jaramdy aqýyz túıirshikterin jasap shyǵaratyn qurylǵy oılap tapty. Bul týraly Qamshy.kz portaly Stan.kz saıtyna silteme jasap habarlaıdy.

Ónertapqyshtardyń pikirinshe, atalǵan qurylǵy jer betinde ashtyqtyń aldyn alady.

«Tájirıbelik turǵydan qaraıtyn bolsaq, aqýyzdy taǵamnyń bul túrin jasaýǵa qajetti zattyń barlyǵy aýanyń quramynda bar. Bolashaqta osy tehnologıanyń negizinde jasalǵan qurylǵylardy shól dalaǵa nemese ashtyq bolý qaýpi bar Jerdiń basqa da aımaqtaryna ornatýǵa bolady. Sondaı-aq, bul qurylǵyny úıge ornatyp, qajet jaǵdaıǵa qoldanǵan abzal», – deıdi Lappeenranta (Fınlándıa) tehnologıalyq ýnıversıtetiniń ǵalymy Iýha-Pekka Pıtkanen.

Onyń sózine qaraǵanda, aýyl sharýashylyǵynyń ózge ónimderimen salystyrǵanda, ónimniń bul túrin ósirý úshin arnaıy qunarlandyrylǵan jerdiń qajeti joq.

«Bul aqýyzdardy avtomatty rejimde ósire alamyz jáne ol úshin arnaıy pestısıdter men toksındi tyńaıtqyshtardy qajet etpeımiz. Bul arqyly aınalanyń lastanýy men jylyjaılyq gazdardyń bólinýin aldyn alýǵa bolady», – dep atap ótti Iýha-Pekka Pıtkanen.