QR SİM baspasóz qyzmetiniń jetekshisi Ánýar Jaınaqov Bahreınde joǵalyp ketken qazaqstandyq Tagına Haıtmetovanyń tabylǵany týraly málimdedi, dep habarlaıdy Qamshy.kz aqparat agenttigi.

24 jastaǵy Tagına Haımetova 27 shilde kúni Astanadan Dýbaıǵa, sol jerden Bahreınge bet alǵan. Qyzdyń ata-anasy 29-shilde kúni qyzdarymen baılanys úzilgen soń qazaqstandyq dıplomattardan izdestirýin surap, kómekke júgingen edi.

«Ol Qazaqstanǵa óz betimen keldi jáne qazirgi ýaqytta týystarynyń janynda. Onyń ata-anasy bizge habarlasyp, jaǵdaıynyń jaqsy ekenin, tek jaqyndarynyń qoldaýyna muqtaj ekenin aıtty. Tagına aıtarlyqtaı psıhologıalyq soqqy alǵan jáne ózge adamdarmen tildesýge daıyn emes. Sondyqtan ázirge oqıǵanyń mán-jaıy anyqtalyp jatyr», – dedi Á.Jaınaqov.

Jaınaqovtyń aıtýynsha, QR Syrtqy ister mınıstrligi zardap shekken qyzdyń sheshimine baılanysty áreket etedi.

Aıta keteıik, tamyz aıynyń basynda qyzdarynyń joǵalyp ketkenin aıtqan Tagına Haıtmetovanyń ata-anasy Syrtqy ister mınıstrligine júgindi. 27 shilde kúni Tagına Astanadan Dýbaıǵa ushqan jáne sol jaqtan Bahreınge attanǵan. Eki kún ótken soń týystary qyzben baılanysty joǵaltqan.