Búgin batysqazaqstandyq delegasıamen birge etnoaýyldaǵy qolóner sheberleriniń týyndylary men mýzeı jádigerlerin kórgen oblys ákimi Altaı Kólginov kórmeler jumysyna oń baǵasyn berdi. Delegattarǵa qolóner sheberi Tólepbergen Sarmanbekov zergerlik buıymdaryn kórsetse, Erbolat Musaǵalıev bylǵarydan jasalǵan aıaq kıimder men belbeýlerdi nazarǵa usyndy. Kórmede Asylan Sarybaev oıýmen ádiptelgen aǵash tuǵyrǵa ásem dombyralardy ornatypty. Buǵan deıin habarlaǵanymyzdaı, etnoaýylda Qostanaı oblysynan kelgen sheberlerdiń buıymdary da qońsylas tigilgen kıiz úıler ishindegi kórmege qoıylǵan.

«Jańa tehnologıamen aǵashtan jáne teri men júnnen óńdelgen ulttyq buıymdarymyzdy ákeldik. Batysqazaqstandyq áriptesterdiń keramıkalyq ydystary men ásem órnektelgen kádesyılary, áshekeı tastary kóńilimizden shyqty. «EKSPO - 2017» kórmesine baılanysty  sheberler jármeńkesin yntymaqtasa ótkizip jatyrmyz», – dedi oblys basshysy Altaı Kólginovke qostanaılyq sýretshi-bezendirýshi Arna Ańqaýov.

Bizdiń oblystyń delegasıasy keıin oblystyq tarıhı-ólketaný mýzeıi usynǵan ekspozısıalyq buıymdaryn tamashalady. Mýzeı dırektory Mırbolat Ersaev óńirdiń tarıhı jádigerlerine Ulybrıtanıa, Italıa, Reseı, Vengrıa, Qytaı, Belgıa elderiniń týrıseri qyzyǵýshylyq tanytqanyn  aıtty. Onyń qatarynda Eýropadaǵy Qaýipsizdik jáne Yntymaqtastyq Uıymynyń (OSCE) Astanadaǵy baǵdarlamalar ofısiniń basshysy, elshi Derd Sabo da oń baǵasyn bergen.

– Elbasymyz rýhanı jańǵyrý tarıhymyzdan bastaý alatynyn aıtqany málim. Iaǵnı, memleket basshysy «ulttyq mádenı saqtalmasa, eshqandaı jańǵyrý bolmaıtynyn» atap ótti. Sondyqtan ulttyq naqyshta bezendirilgen qolóner týyndylary men ólke tarıhynan tereń syr shertetin mýzeı ekspozısıalaryn rýhanı-mádenı qundylyq retinde qasterleýge  tıispiz,  – dedi shara barysynda oblys ákimi Altaı Kólginov.