Qapshaǵaıdaǵy «Sáýle» demalys aımaǵynda eki jigit sýǵa batyp ketti. Bul jaıynda saǵat 17:00 shamasynda sýǵa ketken jigitterdiń áriptesteri operatıvti-qutqarý qyzmetine habarlaǵan, dep jazady Qamshy.kz aqparat agenttigi Patrul.kz saıtyna silteme jasap.

Qutqarýshylar toby oqıǵa ornyna dereý jetip, jeti súńgýir jan-jaqqa bólinip, olardyń denesin izdeı bastady.

Qutqarýshylar eki jigitti izdeý barysynda jaǵajaıda demalyp jatqan ózge adamdardyń barlyǵyna sýǵa túspeýge eskertý jasaldy. Kýágerlerdiń aıtýynsha, eki jigit eskertýdi tyńdamaı, rezeńke qaıyqta júzip ketken eken. Olar shamamen 300 metrge deıin júzip baryp, sýǵa sekirgen, al qaıyq sol sátte aǵyspen olardan uzap ketken kórinedi.

21 jáne 20 jastaǵy eki jigittiń shamamen batyp ketken jerine kýágerler jaqyndap, bótelkemen belgilep ketken. Sonymen qatar, eki jigit batyp bara jatqan kezde bir er adam skýtermen olardyń janyna baryp, bir aınalyp, ary qaraı óz jolymen júrip kete bergen.

İzdeý jumystary bastalǵannan soń 20 mınýttan keıin Jandos Qumarbekov esimdi súńgýir 4 metr tereńdikte jatqan máıitti baıqaǵan. Sýdyń tunyq emestigine qaramastan, Jandos sýdyń túbine deıin baryp, almatylyq jigittiń denesin alyp shyqqan.

Keıinnen, shamamen eki saǵat ótkennen soń Jandos Qumarbekov taǵy bir adamnyń denesin kórip, alyp shyqqan. Belgili bolǵandaı, ol sýǵa batyp ketken ekinshi jigit eken.

Qutqarýshylardyń aıtýynsha, sýǵa túsýge kelgen adamdar kóbinde eskertýlerge mán bermeı, belgilengen aımaqtan asyp ketip jatady. Saldarynan kópshiligi zardap shegip, qaıǵyly oqıǵalar kóptep oryn alady eken. Bıylǵy jazda Qapshaǵaıda 15 adam sýǵa batyp, kóz jumǵan.