2017 jylǵy 21 tamyzda Qazaqstan Respýblıkasy men Italıa Respýblıkasy arasyndaǵy dıplomatıalyq qarym-qatynastardyń ornaǵanyna 25 jyl tolady dep jazady Qamshy.kz aqparat agenttigi.
Shırek ǵasyr ishinde elderimiz arasynda syndarly saıası dıalog ornatylyp, tyǵyz sharttyq-quqyqtyq baza quryldy, saýda-ekonomıkalyq jáne mádenı-gýmanıtarlyq salalardaǵy yntymaqtastyq qarqyndy damydy.
2009 jyly qol qoıylǵan Strategıalyq áriptestik týraly memleketaralyq shart Qazaqstan-Italıa qarym-qatynastarynyń erekshe mártebesin aıǵaqtaıtyn asa eleýli oqıǵa boldy.
BUU, EQYU jáne basqa da halyqaralyq uıymdar sheńberinde senimdi qarym-qatynastar ornatyldy. Qazaqstan men Italıanyń halyqaralyq kún tártibindegi ózekti máseleler boıynsha ustanymdary uqsas. Eki eldiń 2017 jyly BUU Qaýipsizdik Keńesi aıasyndaǵy ózara is-qımylynda bir-birine demeýi osynyń dáleli.
Italıa Qazaqstannyń negizgi syrtqy saýda áriptesteriniń biri bolyp tabylady, ıtalán kompanıalary elimiz ekonomıkasyndaǵy iri ınvestorlardyń qatarynda. Osy jyldar ishinde Qazaqstan ekonomıkasyna tartylǵan ıtalán ınvestısıalarynyń jalpy kólemi shamamen 6 mlrd. AQSH dollaryn qurady. Ónerkásiptik jáne ekonomıkalyq yntymaqtastyq jáne almasý jónindegi úkimetaralyq jumys tobynyń belsendi qyzmeti ekonomıkalyq jáne ınvestısıalyq ózara árekettestikti barynsha keńeıtýge yqpal etýde.
Italıanyń jańartylatyn energıa kózderin qoldanýdaǵy baı tájirıbesin nazarǵa ala otyryp, ıtalán kompanıalary Astanadaǵy EKSPO-2017 halyqaralyq mamandandyrylǵan kórmesine belsendi qatysýda.
Óńiraralyq yntymaqtastyq serpindi damýda. Astana men Mılan, Astana men Frıýlı-Venesıa-Djýlıa óńiri delegasıalarmen turaqty túrde almasýda. Bul yntymaqtastyqqa Qazaqstannyń Italıanyń birqatar qalalaryndaǵy qurmetti konsýldary zor úles qosyp otyr.
Bilim jáne mádenıet salasyndaǵy baılanystar da keńeıip keledi. 2013 jyly Italıada Qazaqstannyń mádenıet kúnderi, al 2016 jyly Qazaqstanda Italıanyń mádenıet kúnderi sátti ótti. «Astana Opera» teatry Mılandaǵy «La Skala», Neapoldegi «San Karlo» jáne Genýıadaǵy «Karlo Felıche» teatrlarymen tyǵyz yntymaqtastyqta.
Qazaqstan Italıamen strategıalyq áriptestikti jan-jaqty nyǵaıtyp, damytýǵa nıetti.
