Qapshaǵaı jasandy sý qoımasynyń jaǵalaýynda 150-den astam demalys bazalary ornalasqan. Jazdykúni shomylý naýqanynyń bastalýymen Qapshaǵaı qalasynyń turǵyndar sany úsh esege ulǵaıady. Bul oryndar jáne olardyń usynystary týrıserdiń qalaýy men jaǵdaıyna qaraı alýan túrli bolyp keledi.
Qapshaǵaı jasandy sý qoımasynyń jeke kásipkerlikke ótpegen aımaǵynda demalýshylarǵa ákimshilik tarapynan jasalǵan jaǵdaı rasymen kóńil qýantady. Qala ákimdigi qolǵa alǵan is jaqsy nátıjelerin kórsetti. Arnaıy kólikturaǵy, qazaq úıler, balalarǵa arnalǵan oıyn alańqaılary jasalǵan.
Jekemenshik demalys aımaqtarynyń ornalasýy men qyzmeti jaqsy bolǵanymen, baǵasy sharyqtap tur. Qarapaıym halyqtyń qaltasy kóteretin demalys aımaqtaryna keler bolsaq, qoıylǵan baǵasyna sapasy saı kelmeıdi, sylap-sıpap jasaı salǵan shala-jansar tirlik qana.
Bir otbasyna táýligine demalý quny 45000 tg bolatyn «MoreLux» demalys ornyn basqa demalys oryndarymen salystyryp kórelik. Jaǵalaýǵa 1 mınýtta jetýge bolatyn qumdy jaǵajaıy bar, sýda júzý sportymen aınalysýǵa qolaıly jaǵdaı jasalǵan, ashyq júzý qaýyzdary jáne fındyq saýna, shezlońti terasasy, bılárd jáne stol tenısi bar. Qonaqúı bólmeleri kondısıoner, tegin Wi-Fi-men, spýtnıktik telearnalarmen jabdyqtalǵan. Baıanbaı Tólegen esimdi kelýshiniń aıtýy boıynsha, qonaq úıdegi tazalyq, qyzmetkerlerdiń sypaıylyǵy, meıramhanadaǵy taǵamdardyń dámdiligi qonaqúı qyzmetiniń baǵasyna turarlyq.
Al, «Aleks» demalys ornyna kirý quny adam basyna 500 tg, onyń ózinde belgilengen naqty oryn joq. Kelýshiler bos jerge baryp, tósenishterin tósep demala beredi. Biraq kúnuzaqqa shekten tys qabyldanǵan kún kózi densaýlyqqa keri áserin tıgizýi ábden múmkin. Tóbesi jabyq tapshandandar kóleminiń úlkendeýine qaraı bes myńnan jıyrma myń teńgege deıin jalǵa beriledi. Kólik demalys aımaǵyna kirgizilmeıdi. Demalys aımaǵynyń tazalyǵy, sýdyń tazalyǵy jaıynda aıtar bolsam, kóp jaǵdaıda sapasy syn kótermeıdi. Qonaqtarǵa kórsetiletin qyzmet kelýshilerdi demalys aımaǵyna kirgizip jiberýmen ǵana shekteledi.
Atalaǵan demalys ornyna kelýshilerdiń biri aımaqtyń qyzmetine razy emes ekenin jetkizdi. Onyń sebebi kelýshiler aımaqqa kirer kezde de, tapshandardy jaldaý úshin de aqsha alatyndaryn aıtty. Soǵan qaramastan kıiz úılerdiń jaǵdaıy máz emes. Qaladaǵy kúıbeń tirshilikten bir sát demalýǵa keletin qonaqtardyń jaǵdaıy durys jasalmaǵan.
Osydan shyǵatyn qorytyndy: qonaqúıdiń baǵasy qanshalyqty qymbat bolsa, sonshalyqty kórsetiletin qyzmet te sapaly bolady. Alaıda oǵan ekiniń biriniń qaltasy kótere bermeıtini anyq. Býrabaıda demalys aqysy shetelde demalýmen salystyrǵanda tym qymbat dep baǵalap júrgen otandastarymyz endigide Qapshaǵaı demalys oryndarynyń baǵasyna narazylyq tanytpasyna eshkim kepildik bere almaıdy.
Aıta ketetin jaıt, qala turǵyndary men qonaqtar arasynda tanymaldylyqqa ıe demalys ornynyń baǵasy men sapasyna qaramastan kelýshilerdiń qatary azaıǵan emes.
Keıingi jyldary Qapshaǵaı sý qoımasynyń demalys bazalaryndaǵy jaǵdaıdy jaqsartyp, qyzmet túrleriniń sapasyn arttyrýǵa Ákimshilik tarapynan kúsh salynyp jatyr. Baǵasyna sapasy saı qyzmetti aldaǵy ýaqytta elimizdiń barlyq demalys oryndaryna kórsek deımiz.
Keleshekte Qapshaǵaı qalasynyń aýmaǵynda jobalyq ataýy «Jańa İle» bolyp keletin iri týrısik ortalyq jáne oıyn-saýyq qalashyǵynyń qurylysy josparlanýda.
Gúlim Lepesbaı
