Alakólde shomylyp júrgen bir mektep muǵalimi altyn balyq ustap alypty. Altyn balyqqa til bitip:
– Aǵataı, meni bosatshy, úsh tilegińdi oryndaıyn, – depti. Sonda muǵalim úsh tilegin aıtypty:
"Birinshi – búginen bastap QR bilim jáne ǵylym mınıstrin, parlament depýtattaryn jáne mektep dırektorlaryn meniń jalaqyma otyrǵyz!
Ekishi – maǵan mınstrdiń jalaqysynyń kóleminde aılyq bergiz!
Úshinshi – QR Atazańyndaǵy 7- baptyń 2 - tarmaǵyn alyp tasta!
Men seni búginnen bastap akvarıýmda ustaımyn. Qashan telearnadan osy ózgerister týraly jańalyq habary beriledi sol kúni Alakólińe ákelip qoıa beremin. Al qazirden bastap úsh tilegimdi oryndaýǵa kiris!" – depti.
Muǵalim altyn balyqty úıine ákelip, akvarıýmǵa salyp, tańdaǵan tamaǵyn berip asyrapty. Sodan bir aıǵa bir kún qalǵanda "HABAR" arnasynan dıktor mynandaı jańalyqtardy habarlapty:
– Búgin QR Bilim jáne ǵylym mınıstri uzaqqa sozylǵan ashtyqtan qaıtys boldy. Ol jańa pantıonǵa jerlenedi.
– Búgin Astanada Parlament depýtattary jalaqylaryn kóbeıtip, úsh ýaqyt tegin tamaqpen qamtamasyz etý týraly talap qoıyp, alańǵa beıbit sherýge shyqty. Beıbit sherýdi uıymdastyrdy degen kúdikpen Senat tóraǵasy men Májilis tóraǵasyn polısıa sarbazdary avtobýstaryna qoldaryn qaıyryp, zorlap kirgizip alyp ketti.
– Búgin SHQO-da mektep dırektory oblystyq Bilim basqarmasynyń bastyǵyna ózin muǵalimdik jumysqa aýystyrý úshin para berip jatqan jerinde ustaldy. Bir eskeretin jaǵdaı respýblıka kóleminde mektep dırektorlarynyń muǵalimdik jumysqa aýysý úshin joǵary jaqqa para berýi kúrt ósýde.
– Búgin Astanada úkimet úıindegi otyrysta QR Premer mınıstri Qazaqstanda barlyq deńgeıdegi jıyndar, is-qatynas qujattary memlekettik tilge 100 paıyz kóshkeni týraly málimdeme jasady.
– Búgin Qazaqstan halyqtar Assambleıasynyń músheleri bos ýaqyttaryn toltyrý úshin Abaıdyń, Maǵjannyń, Muqaǵalıdyń óleńderin jatqa oqýdan jarys ótkizdi.
Bas júldeni Slaván qoǵamynyń tóraǵasy ıemdendi. Jeńimpazdardy quttyqtaǵan Elbasy jarysqa qatysýshylar men barlyq múshelerge, olar tek memlekettik tilde sóılemeı, ózderiniń ana tilderin de umytpaýyn qatty tapsyrdy!
Osylaı sheshimin tappaı kele jatqan talaı máseleni altyn balyq ustaǵan muǵalim bir-aq kúnde sheship, bárin "búldiripti"...
Aımuhanbet Beısembekov
