30 qarasha kúni Ǵ.Músirepov atyndaǵy Qazaq Memlekettik Akademıalyq balalar men jasóspirimder teatrynda QR Tuńǵysh Prezıdenti kúninde uıymdastyrylǵan saltanatty keshte, QR májilisiniń depýtaty, Aýǵan soǵysy ardagerleri uıymynyń «QAZAQSTAN ARDAGERLERİ» qaýymdastyǵynyń tóraǵasy, Aýǵan soǵysynyń ardageri, qoǵam qaıratkeri, aqyn – Baqytbek Smaǵulov, teatrymyzdyń kórkemdik jetekshisi- Erlan Ábdildauly Bilálovty  halyq batyry Baýyrjan Momyshuly atyndaǵy «Namys» ordenimen marapattady. Teatr janrynda talmaı eńbek etip kele jatqan Erlan Ábdildauly, buǵan deıin M.Áýezov atyndaǵy Qazaq Memlekettik Akademıalyq teatry sahnasynda talaı obrazdardy somdaǵan. Atap aıtsaq, M.Áýezovtyń «Qıly zaman» dramasynda Uzaq batyr, I.Saparbaevtyń «Syǵan serenadasynda» Shámshi, D.Isabekovtyń «Jaýjúrek» dramasynda Balýan Sholaq, Á.Tarazı «Aqyn. Perishte. Mahabbat.» Muqaǵalı t.b.  Al, dál osy dańqty qolbasshy atyndaǵy  mártebeli ordendi Sh.Aıtmatov pen Q.Muhametjanovtyń «Kóktóbedegi kezdesý» týyndysyndaǵy Mámbet róli úshin berilgenin atap ótkenimiz jón bolar.

 Tuńǵysh Prezıdent kúnimen tuspa-tus kelgen mereıli sátte óz  tarapymyzdan tilerimiz – eńbekte tolaǵaı tabystarǵa, maqsatta bıik shyńdarǵa jete berińiz, abyroı-bedelińiz arta bersin, júzińiz jarqyn, mereıińiz ústem bolsyn degimiz keledi!