AQSH prezıdenti Donald Tramp «Harvı» alapat daýylynyń saldarymen kúres úshin Kongresten 6 mıllıardqa jýyq qarjy suramaq. Bul týraly Qamshy.kz aqparat agenttigi  Associated Press málimetine súıenip habarlaıdy. 

Bılik ókilderi bul somanyń áli ózgerýi múmkin ekenin aıtady. Kongrestiń qos palatasy ózekti máseleni búgin qaraǵaly jatyr. Qazirge deıin kómek retinde 530 mıllıon dollar bólingen. Al Tehas gýbernatory Greg Ebbot buǵan deıin federaldy úkimetten apatpen kúresýge 125 mıllıard dollar qarjy suraǵan edi.

Sarapshylar joıqyn daýyldan kelgen shyǵyn 160 mıllıardtan asyp túsedi dep otyr. Sońǵy aqparatqa qaraǵanda daýyldan qaza tapqandar sany 40-qa jetken. Kómekke zárý 13 myń turǵyn qutqaryldy. Sý tasqynynan 100 myń úı búlingen. Qutqarý jumysyna 25 myńǵa jýyq sarbaz jumyldyryldy. Qazir daýyl Mıssısıpı men Tenessı shtatyna qaraı bet alypty.