ALMATY. QazAqparat - Almatyda Bostandyq aýdanynda jańa meshit ashyldy. Ǵıbadat ornynda 3 myń adam bir mezette qulshylyq ete alady. Jańa meshitke Elbasynyń usynysymen memleket jáne qoǵam qaıratkeri Báıken Áshimovtiń aty berildi. Meshittiń ashylý saltanatyna qala basshysy Ahmetjan Esimov, QR Bas múftıi Erjan qajy Malǵajyuly, QMDB ókilderi, ózge de memleket jáne qoǵam qaıratkerleri qatysty. «Búgin - aq túıeniń qarny jarylǵan qýanyshty kún. Sáýleti kelisken rýhanı ordalarymyz boı kóterip keledi. Almatyda qalalyq jamaǵatqa yńǵaıly bolý úshin 3 qabatty avtoturaǵy bar meshit ashyldy. Bul qalalyq ómirge beıimdelip salynǵan jalǵyz meshit dese bolady. Búgingi tańda elimizdiń barlyq óńirlerinde dinı qulshylyq oryndary ashylyp jatyr. Bul degenimiz - qoǵamymyzdyń ımandylyqqa bet burǵandyǵyn, eldiń ál-aýqatynyń jaqsarǵanyn kórsetedi. Meshit tek qana bes ýaqyt namaz oqıtyn oryn emes, sondaı-aq, rýhanı turaqtylyqtyń ortasy bolýy kerek», - dedi QR Bas múftıi Erjan qajy Malǵajyuly. Bul Almatydaǵy 39-shy meshit ekenin aıta ketý kerek. Rýhanı ortalyq 2013 jyldan bastap salyndy. Basty ereksheligi - zaman aǵymyna saı keń avtoturaqpen qamtylǵan. 3 qabatty avtoturaqtyń ár qabatyna 88 kólik syıady.  Jańa meshitte ǵıbadat etý bólmelerinen basqa dinı saýat ashý bólimderi de qarastyrylǵan. Búgin munda QMDB tóraǵasynyń bastaýymen alǵashqy juma namazy oqyldy. Jalpy meshitke kelgen qaýym arnaıy demeýshilerge jáne Qazaqstan musylmandary dinı basqarmasyna alǵys bildirýde. inform.kz