Demokratıalyq kúshterdiń "Qazaqstan-2050" jalpyulttyq koalısıasynyń otyrysynda "Nur Otan" partıasy Tóraǵasynyń Birinshi orynbasary Muhtar Qul-Muhammed latynǵa kóshý ultymyzǵa qatysty úsh birdeı máseleniń oń sheshilýine septigin tıgizetinin aıtty dep habarlaıdy Qamshy.kz aqparat agenttigi. 

– Ult taǵdyryna qatysty kez kelgen máseleni on oılanyp, júz tolǵanyp, ózine ǵana tán darhan danalyqpen kemel sheshim qabyldaıtyn Elbasymyz latyn alfavıtine kóshýge kelgende taǵy da kemeńgerlik tanytty. Bul tek álipbı aýystyrý emes, bar qazaqtyń boıyna ana súti, áke tárbıesimen darıtyn qazaq tilin zamanaǵa saı jańǵyrtýdyń keshendi júıesin, durys sóıleý men jazý mádenıetin qalyptastyrý dep bilemin. Endeshe latynǵa kóshý Elbasymyz usynǵan «Rýhanı jańǵyrýdyń» berik irgetasy dep bilemin. Latynǵa kóshý arqyly biz ultymyzdyń álemdik básekege qabilettiligin arttyratyn úsh máseleni sheshemiz. Birinshiden, aǵylshyn alfavıtiniń negizindegi jańa qarip júıesi jastarymyzdyń da jasamystarymyzdyń da aǵylshyn tilin meńgerýin jeńildetedi ári jedeldetedi. Ekinshiden, aǵylshyn alfavıti men tilin úırený arqyly ǵylym-bilimniń osy tilde jasalǵan mol qazynasyn erkin ıgerýge jol ashady. Úshinshiden, jer júzine tarydaı shashylǵan bar qazaqtyń basyn qosady. Kırıllısada jasalǵan bar ádebı qundylyq túgeldeı kompúterlik nusqaǵa kóshiriledi. Sondyqtan latynǵa kóshý arqyly rýhanı baılyǵymyz sıfrlyq tehnologıa tilinde odan ári órken jaıady. Osyny halyqqa túsindirýdiń kósh basynda zıaly qaýym ókilderi bolýǵa tıis.