Qazaqstanda dızaıny ózgertilgen 1000 (bir myń) teńgelik banknot aınalymǵa shyqty, - dep habarlaıdy Tengrinews.kz tilshisi Ulttyq banktiń baspasóz qyzmetine silteme jasap. "QR Ulttyq banki týraly" zańyna, QR Prezıdentiniń jarlyǵymen bekitilgen Qazaqstan teńgesi – ulttyq valúta banknottary men monetalary dızaınynyń tujyrymdamasyna sáıkes, Ulttyq bank basqarmasynyń "Dızaıny ózgertilgen nomınaldyq quny 1000 (myń) teńge banknotty aınalymǵa shyǵarý týraly" qaýlysyn basshylyqqa ala otyryp, Ulttyq bank 2014 jylǵy 1 jeltoqsannan bastap dızaıny ózgertilgen myń teńgelik banknotty aınalymǵa shyǵardy dep habarlaıdy", - delingen habarlamada.

Dızaıny ózgertilgen myń teńgelik banknot mólsheri 134h70 mm qaǵazda daıyndalǵan. Betki jaǵynda sary-qońyr tús basym, beıneler tiginen ornalasqan. Negizgi beıneler banknottyń oń jaǵynda beınelengen, olar "Qazaq Eli" monýmenti jáne tómengi jaǵynda ortada ushyp júrgen kógershinderdiń beınesi bar. Joǵarǵy bóliginde memlekettik eltańba jáne memlekettik tý beınelengen. Sol jaq tómengi jáne joǵarǵy bóliginde nomınaldyń sıfrlyq belgisi men sol jaq ortada nomınaldyń memlekettik tildegi árip belgisi basylǵan.

"Nomınaldyń syrt jaǵyndaǵy da basym tús - sary-qońyr, basym beıneler kóldeneńinen ornalasqan", - deıdi Ulttyq bank mamandary. Onda Batys Qazaqstandaǵy Ústirt shoqysy, artqy jaǵynda Qazaqstan kartasynyń kontýry beınelengen.

Eske sala keteıik, QR Ulttyq banki ótken jyly da 1000 teńgelik banknottyń dızaıny ózgergen nusqasyn aınalymǵa shyǵarǵan edi. Bul banknot "Kúltegin" túrki jazba eskertkishine arnaldy.