Tanymal telejýrnalıst, aqyn Názıra Berdaly Ermahanqyzy telearnaǵa qalaı kelgeni jaıynda óziniń Instagram paraqshasynda jazdy.
"2000 jyl. Qazaq radıosynda jarty stavkamen jumys isteımin. Stýdentpin. Apta boıy - sabaq. Jeksenbi tańǵy 6-da kelip, "Qaıyrly tańnan" bastap, saǵat saıyn jańalyq oqyp, quttyqtaý habarlardy júrgizip, keshki 9-dan keıin qaıtamyn. Radıonyń ol kezdegi juldyzdary Tolqyn Seıdollaqyzy, Aıgúl Myrzahanqyzy. Qastarynda "a" dep aýyz ashýǵa ımenemiz.
Bir kúni "Qazaqstan" telearnasy "Tańsholpandy" qaıta ashady eken. Júrgizýshi izdep jatyr degen habar jetti. Radıoda Borankúl apaı degen sondaı meıirban kisi bolatyn. Dybys operatory. Aq sary júzi, saqyldaǵan kúlkisi áli esimde. Sol kisiniń qaıraýymen, "barsańshy, kórseńshi" deýimen televıdenıege júgirip bara qoıdym. Radıomen kórshi, arany bir aýla ǵana bólip tur. Sonymen ne kerek, álbette, men kastıngten ótpedim. Jumysqa radıodaǵy áriptesterimiz Tolqyn Seıdollaqyzy men Baqyt Jaǵyparulyn jáne aktrısa Kúnsulý Turǵynbekqyzyn aldy. Tynys Ótebaev degen dıktor aǵamyzdy biletin shyǵarsyzdar? Sol kisi maǵan "este saqtaý qabiletiń jaqsy eken. Dıktorǵa bul óte kerek qabilet" dedi. Sebebi, ol kezde júrgizýshiler sýflersyz (mátindi ekrannan oqymaı, jattap alyp) shyǵatyn. Ol týraly sál keıinirek jazamyn. "Tańsholpannyń" jetekshisi, marqum Abdolla Altyı Súleımen "túriń Rabıǵa Amanjolovaǵa uqsaıdy. Bizge erekshe jańa beıneler kerek" dedi. Men televızıanyń has mamandarynan osyndaı pikir estigenime rıza bop, radıoǵa qaıtyp keldim. Biraq, televıdenıe bir sıqyr tárizdi ózine tartty da turdy. Kúnde sabaqtan soń qylqıyp "Tańsholpanǵa" kelip turamyn. (Kastıngten shyqqanda rejıser Baqyt apaı "bizge kelip tur. Bolashaǵy bar balasyń. Úırene beresiń" degen edi). "Aǵa, apaı, kómek kerek pe? Meni sújetke jiberińizdershi" dep, Baqyt Jaǵypardyń, Baqyt apaı, Álıa apaılardyń qasynan shyqpaımyn. Bir jaqsysy, ol kezde praktıkantty tegin jumys kúshi retinde paıdalanyp, kamerany senip tapsyryp, sújetke shyǵara beretin. Gúljazıra Berikqyzy júretin, qonaqkáde me, bir aıdardy júrgizip. Teginnen-tegin salpaqtap. Bir kúni redaksıaǵa kelsem, Kúnsulý syńǵyrlap kúlip, Baqyt ekeýi senarı jazyp otyr eken. Qoldarynda kitap, gazet, kúntizbe bar. Aqparatty sol jerden alady. Ǵalamtor degen atymen joq. Bizge tipti kompúterdiń kelmegen shaǵy. Senarıdi jazý mashınkasyna, qap-qalyń sary qaǵazdardyń arasyna qara qaǵaz qoıyp basamyz. Eki ekzemplár bop shyǵady. Ol jetkiliksiz. Eki júrgizýshige, rejıserge, redaktorǵa, dybys rejıserine senarı kerek. Jýrfakta Baıalıeva Dámegúl apaıymyz "on saýsaq soqyr ádisti" úıretken. (Áli de paıdasy bar maǵan, klavıatýraǵa qaramaı basa beremin)."Ákelińizder, men basaıyn, sizder oqyńyzdar" dep, júrgizýshilerdiń qasyna otyrdym. "Mássaǵan, tez basasyń ǵoı. Kúnde osylaı kómektesip turshy" dedi Kúnsulý . Sonymen, sekretar-mashınıstka boldym. Arasynda "bylaı aıtsańyzdar qaıtedi" dep, senarısterge oı qosyp qoıamyn. Ábden meńgerip aldym. Baqyt pen Kúnsulý "Názıra, óziń jaza salshy" deıtin boldy. Birde Kúnsulý teatrmen gastrólge ketti. Ornyna ýaqytsha dep meni shyǵardy. Senarıdi ózim jazyp júrmin, sújet (stendap) jasap júrmin, onymdy basshylar baıqaıdy ǵoı. Áli esimde, 8 naýryz qarsańy bolatyn. Merekelik habarǵa kıip shyǵatyn kıim joq. Sonda telearna dırektory Serik Ahmetov Baqytqa óziniń birkıer kostúmin ákep kıgizgen. Respýblıkadaǵy basty telearnada kıimge, kompúterge, tehnıkaǵa aqsha bolǵan joq. Jumysta jappaı qysqartý júrgen. Sonda burynnan kele jatqan áriptester "anany qysqartpa, meniń jarty jalaqymdy ber" dep alyp qalǵan jaǵdaılar da bolǵan eken. Óziniń aılyǵy shaılyǵyna jetpeı júrgenine qaramastan. 5000 teńge aılyqqa Gúljazıra ekeýmizden basqa kim kelsin? Jýrnalıserdiń kóbi jumysyn tastap, bazarǵa shyǵyp ketken. Anama kóılek keregin aıttym. 8 naýryzda efırge kıip shyǵatyn. Sandyǵynda jasyl kostúmdik mata bar eken. Sodan atelege tiktirip berdi. Jýrfakta "dıktor mindetti túrde jeńi uzyn, jaǵaly kıim kıý kerek" dep oqytqandyqtan, jaǵa-jeńi bolsyn dedim. Qazir aıtsam, munyń bári ertegi sıaqty. Mine, men televıdenıege osylaı keldim..."
