Orta salmaqtaǵy WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın (37-0-1, 33 KO) men meksıkalyq boksshy Saýl «Kanelo» Alvares (49-1-2, 34 KO) arasyndaǵy ekinshi kezdesýi 2018 jyldyń mamyrynan buryn ótýi múmkin. 
Bul týraly meksıkalyq boksshynyń kelisimsharttarymen aınalysatyn, Golden Boy Promotions kompanıasynyń prezıdenti Erık Gomes aıtty, dep jazady BoxingScene portaly.

Ekinshi kezdesýdiń qashan ótetini naqty belgilengen joq. Alaıda búginde kóptegen boks mamandary «ekinshi kezdesýdiń 5 mamyrda ótedi» dep aıtyp júr. 
«Ekinshi kezdesýdiń naqty qashan ótetini áli belgisiz. Bul másele de kelissózder kezinde sheshiledi. Múmkin, jekpe-jek mamyrdan buryn da ótýi múmkin. Degenmen kezdesýdi mamyr aıynda ótkizgen qolaıly. Bul eń aldymen PPV úshin», – dedi Gomes. 

Aıta keteıik, qazan aıynyń basynda Búkilálemdik boks keńesi Golovkın men Alvares arasyndaǵy ekinshi kezdesýdiń ótýine resmı kelisim berdi. Eki boksshynyń komandasy qazirgi ýaqytta kelissózder júrgizip jatyr. 
Eske salaıyq, Golovkın men «Kanelo» alǵashqy kezdesýin 16 qyrkúıek kúni Las-Vegasta ótkizip, jekpe-jekti teń aıaqtaǵan edi. Sonymen, qazaqstandyq boksshy ózine tıesili barlyq belbeýlerin qorǵap qalǵan bolatyn.