Semá – shaǵyn memleket.
Men – prezıdent, sen – premer.
Arttym saǵan kóp mindet,
Premer joldas, ber prımer.
Men tyńdar dep selt etpe,
Eskiliktiń ýaǵazyn.
Sen orynda, eki etpe
Prezıdenttiń ýkazyn.
Basqara bil úı ishin,
Berdim saǵan bılikti.
Jemisti bolsa jumysyń,
Men aıaman syılyqty.
Bar dosym da, bar dushpan,
Sal oılanyp aqylǵa.
Alystaı bil alystan,
Jaqyndaı bil jaqynǵa.
Jaýaptymyz siz ben biz,
Uqsyn basqa uqpasyn.
Memleketke táýelsiz
Dushpan qolyn suqpasyn.
Kókiregimniń kúıi úshin,
Sen eńbek et men úshin.
Basqar óziń úı ishin,
Men jyrlaıyn el úshin.
Jyr toqımyn kóp oıǵa,
Jeter me eken ýaqytym.
Men de oılaımyn, sen de oıla
Balalardyń baqytyn.
Bizdiń baıtaq elimiz,
Semálardan quralǵan.
Elin súıer, senińiz,
Óz semásyn súıe alǵan.
Súı elińdi – úıińdeı,
Súı úıińdi – elińdeı.
Kókirektegi kúıińdeı
Jyryńdy jaz erinbeı.
Bul óleń Qasym Amanjolovtyń 1953 jyly jazylǵan óleńi. «Otan otbasynan bastalady» dep jıi aıtamyz. Bárimiz otanymyzdy súıetin otansúıgish patrıottarmyz. Alaıda, otbasyn qadirleı, ardaqtaı bermeımiz. Oǵan sebep otbasy qundylyǵyn saqtamaıtynymyzda.
2016 jyly Qazaqstanda 140 840 neke tirkelgen. Degenmen osy bir jyl ishinde 51 775 otbasy ajyrasyp ketken. (140 840 nekeniń emes, jalpy alǵanda ajyrasqandar). Onyń ishinde, óńirimizde ajyrasý úılengenderdiń úshten birine teń bolǵan (Batys Qazaqstan oblysy 5 030/ 1829).
Ulybrıtanıalyq The Economist jýrnalynyń dástúrli "Álem statısıkasy - 2015" jınaǵynda Qyrǵyzstan ajyrasý kórsetkishi boıynsha álem elderi arasynda 48-orynda tur. Al Qazaqstan bolsa, alǵashqy ondyqqa kirgen.
Áleýmettanýshy, Eýrazıa ulttyq ýnıversıtetiniń oqytýshysy Aıgúl Zabırova eldegi ajyrasýdyń kóbeıýinde zańdylyq bar deıdi. Onyń aıtýynsha, 1990 jylmen 2010 jyldaǵy derekterge qaraǵanda, qala halqy kóbeıip, aýyl turǵyny azaıǵan. Sonyń áserinen áıel men erkektiń statýsy da ózgergen. Eti tiri, oqyǵan qazaq qyzdaryna qalada kóp múmkindik ashylǵan. Burynǵydaı aýylda qalyp, ata-anaǵa, aǵaıyn-týysqa, qarjyǵa táýeldilik joıylǵan.
"Áıel úshin qalada jumys, múmkindik kóp. Áıeldiń ózine degen senimi artty. Buryn sovet kezinde adamdy úılengen-úılenbegeni, ajyrasqanyna qarap baǵalaıtyn. Qazir bul pikir ózgerdi. Sózderi jaraspaǵan juptarda buryn «bala úshin shydaý kerek» degen túsinik bolsa, qazir «balany aldamaý, olar úshin ótirik baqytty bolýdyń qajeti joq, shynaıy ómir súrý kerek» degen pikir qalyptasty,– deıdi Aıgúl Zabırova.
Al Ulybrıtanıanyń bedeldi basylymy The Economist jarıalaǵan sońǵy "Álem statısıkasynda" Qazaqstan ajyrasýdan 10-orynda tur. Mundaǵy derek boıynsha, myń adamǵa shaqqanda Qazaqstandaǵy ajyrsý kórsetkishi – 2,7. Biraq Qazaqstan úılený jaǵynan da aldyńǵy ondyqtyń ishinde, ıaǵnı 9-oryn. Myń adamǵa shaqqanda úılený kórsetkishi de soǵurlym joǵary- 9,7.
Uly elmiz, jetimin jylatpaǵan, jesirin qańǵyrtpaǵan halyqpyz dep maqtanamyz. Memleket basshysy N.Á.Nazarbaevtyń otbasy ınstıtýtyn nyǵaıtý men rýhanı-adamgershilik tárbıeni kóterýge erekshe kóńil bólip kele jatqandyǵyn aıtyp keledi. Endeshe, árkim óz otbasyn saqtaýda otanyna qyzmet etip jatqanyn túsingeni abzal.
Nazerke Toqjan
