Qyrǵyzstan prezıdenti Almazbek Atambaev 2017 jyly qarashanyń 15-i «Ala-Archa» memlekettik rezıdensıasynda turaqty damý jónindegi Ulttyq keńes otyrysynda qazaq-qyrǵyz shekarasyndaǵy ahýal jóninde sóılep, eshkimnen keshirim suramaıtynyn málimdedi. Bul týraly Qamshy.kz aqparat agenttigi Azattyqqa silteme jasap habarlaıdy.

 - Men ne úshin keshirim suraýym kerek? Qyrǵyzstannyń ishki isine aralaspaýdy talap etkenim úshin be? Qyrǵyzstan zańdaryn qurmetteýdi talap etkenim úshin be? Eshkim budan ary bizge óziniń tártipterin ornata almaıdy, - dep málimdedi Atambaev.

Sóz sońynda Almazbek Atambaev qyrǵyzstandyqtarǵa qarata «2010 jylǵy blokadany da kórgenbiz, 2014 jylǵy energetıkalyq blokadany da kórdik, bul blokadan da ótermiz. Prezıdentter erte me, kesh pe - ketedi. Keıde olar óz erikterimen ketedi, keıde halyqtyń erkimen ketedi, keıde Qudaıdyń erkimen ketedi. Al halyq qalady. Kórshini syılaý kerek, kórshimen dos bolý kerek» dedi. Ol munan soń shekaradaǵy jaǵdaıdyń Qyrǵyzstan ınfraqurylymyn damytý qajet ekenin kórsetkenin aıtty.

Qazan aıynyń 10-ynan keıin Qazaqstan qazaq-qyrǵyz shekarasynda tekseris kúrt kúsheıtip, osynyń kesirinen ótkizý pýnktterinde júk kólikteriniń uzaq-sonar kezegi paıda bolǵan. Taýarlaryn Qazaqstan shekarasynan ótkize almaǵan kásipkerler shyǵynǵa batqandaryn málimdegen.

Qazannyń 25-nde Qazaqstan úkimeti Qyrǵyzstannyń Qytaıdan jasyryn taýar ótkizetinin málimdep, shekaradaǵy áreketin kontrabandaǵa qarsy kúres retinde kórsetken. Qyrǵyzstan úkimeti Qytaıdan rásimdelmegen taýarlar tasıtynyn teriske shyǵaryp otyr.

Qazaq-qyrǵyz shekarasyndaǵy daý áli túbegeıli sheshilgen joq. Atambaevtyń "keshirim suramaıtyny" týraly keıingi málimdemesine ázirge Qazaqstan tarapynan qandaı da bir resmı reaksıa bilinbeıdi.