Jeńgeńiz Zýhra qaıtys bolǵaly beri Sizdiń “Jubaılar bar áńgimesi taýsylǵan, Al mahabbat – taýsylmaıtyn áńgime!” degen eki jol óleńińiz esime jıi oralatyn boldy... Kezinde osy óleńińizdiń tóńireginde Zýhra ekeýmiz uzaq áńgime órbitkenbiz... Tipti Sizdiń Qorlan syılaǵan júzikti 51 jyl boıy qolyna taǵyp kelip, o dúnıege de ózimen birge áketken Estaı aqyn týraly jyryńyzdy da ol teledıdar arqyly berilgen keshińizden uǵyp, maǵan tańdana aıtyp bergen edi...

...Zýhra jeńgeńizdiń búkil ómiri izdenispen ótti dep aıta alamyn. Mysaly, ol dúnıe­ge múlde qyzyqpaıtyn. Bul jaǵynan da ekeýmizdiń aramyzda erekshe uqsastyq boı kórsetti.

Sizge taǵy bir syrymdy ashaıyn. Zýhramen jarty ǵasyrdan astam jubaılyq ǵumyr keshsek te aramyzda bala bolmady. Taǵdyrdyń bul tálkegi janymyzǵa qatty bat­qanyn da jasyrmaımyn. Birde áýletimizdiń aqylman qarıalary jınalyp: “Dımash, kelinniń erekshe jaqsy adam ekenin bilemiz. Ata dástúrge júginsek, óziń sıaqty atpal azamattan urpaq alyp qalmaý – eldigimizge syn. Tipti, Muhammed Paıǵambar da osy salada úlgi kórsetpedi me? Bálkim, buǵan kelin de qarsy bolmas!” – dedi. Ras, Zýhra da qarıalardyń usynysyn qoldady. Ózim kónbedim. Sebebi, men úshin Zýhra sıaqty áıel jalǵanda bireý ǵana. Sondyqtan onyń maǵan degen sheksiz mahabbatyna kóleńke túsirgennen góri, taǵdyrdyń peshenemizge jazǵanyna moıynsuný áldeqaıda jeńil sanadym.

(“Qonaevpen syrlasý” atty kitaptan)