Qazaq sóziniń qaımaǵy aıtys ónerinde ǵana qalǵan edi. Endi onyń da túbine jetýdiń alǵashqy qadamy jasaldy... El-jurttyń renishin eskerip, qoıa salar degenbiz. Biraq, qoıatyn túri joq, kesheden beri «jalǵastyramyz» degen «jańalyq» estip jatyrmyz.  Al, basqa «óner» dep júrgenimizdiń jaıy belgili bolatyn. Julqyný, shyńǵyrý, selkildeý, aıǵaılaý, yńyrsý, yńyraný, shińkildeý,  sheshiný, esirý, bet-aýyz tyrjyńdatý,  beldi bultyńdatý, qoldy bulǵaqtatý. Oısyz oıyn men sólsiz sózden yǵyrymyz shyǵyp júrgende taǵy bir tunyǵymyz laılandy. Babadan qalǵan qasıetti aıtys qorlandy, sál buryn Júrsin men Bekbolattyń «máselesine» bas aýyrtatyn edik, mine, aldymyzda basqa «syı» kútip turypty. Buryn Qanattyń qyljaǵyna qaryq bolyp júrgen jurttyń ne aıtatynyn bilmeımin, aıtys tyńdap júrgen aǵaıynǵa ońaı tıgen joq. Óz basym osy joly bir nársege tańǵaldym, Júrsin Erman syrtynan anaý-mynaý sóz aıtatyn emes, ákemdeı adam, qazaq aıtysyn kóterip júrgen qara nar. Ádil-qazylardyń arasyndaǵy Bekbolat Tileýhan qara sóziń qasıeti daryǵan talant.  Muhamedjan bolsa bir ózi búgingi aıtystan oza shapqan júırik, qalǵandary da qarajaıaý emes, táp-táýir azamattar. Biraq, biriniń aýzyna salmaqty ýáj, sálıqaly sóz túspedi. Esesine, artyq aıtýǵa aýyz barmaı otyr,  jurtpen birge jyrqyldaýmen boldy.    Endi osylaı aıtystyń aınasyndaı bolǵan aǵalardan kórgenimiz osy bolsa, basqa kimnen asqandy tosatyn sóz kútemiz. Áıteýir áleýmettik jelidegi aǵaıynǵa rıza boldyq, az da bolsa qoǵamdyq pikir týǵyzdy. Arasynda uıymdastyrýshylarǵa beıpil sóz baǵyttaǵandar da boldy, olardy tolyqtaı túsinemiz deýge haqymyz bar. Óıtkeni,  aıtys – árqaısymyzǵa atamyzdan qalǵan mura. Bizdiń aıtarymyz –  abyroı jınaǵan sheleginiń túbi tesileıin dep júrgen aǵalarymyz abaılasa eken...

Tumar Beısenhan