Qoı jyly bastalǵaly elimizdiń ortalyq jáne jergilikti atqarýshy organdarynda taǵaıyndaýlar az bolǵanmen, sport salasynda jáne sot júıesinde aıtarlyqtaı kadrlyq aýys-túıis oryn aldy.
Sonymen, budan buryn habarlaǵanymyzdaı, ótken aptada QR Densaýlyq saqtaý jáne áleýmettik damý mınıstrliginde vedomstvo basshysynyń jańa orynbasary taǵaıyndaldy. Bul týraly QazAqparat tilshisine mınıstrliktiń baspasóz qyzmeti málim etken bolatyn.
Bul qyzmette Serikbol Mýsınovti Alekseı Soı almastyrdy.
Alekseı Vladımırovıch Soı bunyń aldynda 3 jyl boıy «Astana qalalyq №1 aýrýhanasynyń» bas dárigeri qyzmetin atqarǵan bolatyn.
Al Serikbol Mýsınov Densaýlyq saqtaý jáne áleýmettik damý vıse-mınıstri qyzmetinen bosatyldy.
Aqmola oblysynyń kimi Sergeı Kýlagınniń ókimimen jáne qalalyq máslıhat depýtattary kelisiminiń negizinde Ermek Boranbaıuly Marjyqpaev Kókshetaý qalasynyń ákimi bolyp taǵaıyndaldy.
Ermek Boranbaıuly 1969 jyly týǵan, úsh joǵary bilimi bar, 1994 jyly S.Seıfýllın atyndaǵy Aqmola memlekettik pedagogıkalyq ınstıtýtyn tarıh páni muǵalimi mamandyǵy boıynsha, 2001 jyly «Turan» ýnıversıtetin zańger mamandyǵy boıynsha, 2009 jyly Kókshetaý ýnıversıtetin qarjy baklavry mamandyǵy boıynsha aıaqtaǵan.
Eńbek jolyn 1991 jyly Astana qalasynyń №29 orta mektebiniń dene shynyqtyrý pániniń muǵalimi, boks bapkeri bolyp bastady. 1993 jylǵy qańtardan bastap 1994 jylǵy qarasha aralyǵynda Shýche aýdany Býrabaı kentiniń №7 orta mektebinde tarıh pániniń muǵalimi bolyp jumys jasady. 1994 jylǵy qarasha men 1995 jylǵy maýsym aralyǵynda Shýche qalasy «Shonaı» shaǵyn kásiporynynyń dırektory qyzmetinde boldy. 1995 jylǵy maýsymnan bastap «Bereke-Býrabaı» JSHS bas dırektory qyzmetin atqardy.
2008 jylǵy tamyzdan bastap Arshaly aýdanynyń ákimi laýazymyn, 2012 jylǵy sáýirden bastap 2013 jylǵy qyrkúıek aralyǵynda Zerendi aýdanynyń ákimi laýazymyn atqardy. Keıin 2014 jylǵy maýsymǵa deıin Aqmola oblysy ákiminiń orynbasary qyzmetinde boldy.
Sońǵy qyzmet orny 2014 jyldyń maýsym aıynan bastap Qazaqstan Respýblıkasy Prezıdentiniń Ákimshiligi Memlekettik baqylaý jáne aýmaqtyq-uıymdastyrý bóliminiń Memlekettik ınspektory laýazymyn atqardy.
Aqmola oblystyq máslıhatynyń depýtaty bolyp saılanǵan. «Qurmet» ordenimen, mereıtoılyq medaldarmen nagradtalǵan.
Qala aktıvine jańa ákimdi tanystyra kelip, óńir basshysy Sergeı Kýlagın oblys ortalyǵyndaǵy aldyńǵy kezekte sheshýdi qajet etetin mindetterge qysqasha toqtalyp ótti.
Eske sala ketsek, qalanyń burynǵy ákimi Jomart Nurǵalıev bar bolǵany 5 aıǵa jýyq qyzmet istep, ótken jyldyń 30 qazanynda júrek talmasynan qaıtys bolǵan edi. Sodan beri Kókshetaý qalasy ákiminiń mindetin qala ákiminiń orynbasary Amangeldi Smaıylov atqaryp keldi.
Al Qyzylorda qalasynda ákimniń jańa orynbasary taǵaıyndaldy. Qyzylorda qalasy ákiminiń ókimimen Qosym Dúısenáliuly Ańsatbaev qala ákiminiń orynbasary boldy.
Qosym Dúısenáliuly 1981 jyldyń 2 qańtarynda Túrkimenstan Respýblıkasynda dúnıege kelgen. 1998-2002 jyldary Astana qalasyndaǵy Qazaq memlekettik zań ýnıversıtetin «Zańger» jáne 2008-2010 jyldary Qyzylorda qalasyndaǵy «Bolashaq» ýnıversıtetin «Qurylysshy» mamandyqtary boıynsha bitirgen.
Eńbek jolyn 2002 jyly Qyzylorda Qazaq gýmanıtarlyq-zań ýnıversıtetinde oqytýshy qyzmetinen bastaǵan. 2004-2005 jyldary Qyzylorda oblysynyń saýda jáne memlekettik satyp alý basqarmasynyń jetekshi mamany, bas mamany;
2005-2006 jyldary Qyzylorda oblysynyń sáýlet, qala qurylysy jáne qurylys departamentiniń bas mamany, bólim basshysy;
2006-2011 jyldary Qyzylorda oblysynyń memlekettik sáýlet-qurylys baqylaý basqarmasynyń bólim basshysy, basqarma basshysynyń orynbasary;
2011 jyldan osy ýaqytqa deıin Qyzylorda oblysy boıynsha memlekettik sáýlet-qurylys baqylaý jáne lısenzıalaý departamenti dırektorynyń orynbasary, departament basshysy qyzmetterin abyroımen atqarǵan.
«Nur otan» partıasy respýblıkalyq qoǵamdyq qabyldaýynyń jetekshisi bolyp Abylaıhan Ospanov taǵaıyndaldy. Abylaıhan Ospanov L.N.Gýmılev atyndaǵy Eýrazıalyq ulttyq ýnıversıtetin «Aqparattandyrý» mamandyǵy boıynsha támamdaǵan. 2006-2010 jyldary ońtaılandyrý jáne basqarý jobasy boıynsha bólimderdegi komersıalyq uıymdarda jumys istedi. 2010-2014 jyldary QR İshki ister mınıstrliginde aǵa ınjener, QR Baılanys jáne aqparat mınıstrliginiń aqparattyq tehnologıalar salasy Memlekettik saıasat departamenti dırektorynyń orynbasary, QR Kólik jáne komýnıkasıa mınıstrliginiń Memlekettik qyzmetti avtomattandyrý jáne halyqqa qyzmet kórsetý ortalyqtarynyń qyzmetin úılestirý boıynsha baqylaý komıteti tóraǵasynyń orynbasary, Elektrondyq qyzmet jáne baılanys pen aqparat boıynsha, Qazaqstan Respýblıkasy Agenttiginiń HQO damytý departamentiniń dırektory qyzmetterin atqardy. Bul qyzmetke taǵaıyndalǵanǵa deıin QR ınvestısıa jáne damý mınıstrliginiń Baılanys, aqparattandyrý jáne aqparat boıynsha Komıtetiniń memlekettik qyzmet kórsetýdi ońtaılandyrý basqarmasynyń jetekshisi qyzmetinde boldy.
Sýdıalar:
Qoı jyly bastalysymen el óńirlerinde sot tóraǵalary aýystyryla bastady.Birqatar aımaqtarda Qazaqstan Respýblıkasy Prezıdentiniń Jarlyǵyna sáıkes jańadan taǵaıyndalǵan oblystyq jáne oǵan teńestirilgen sottardyń tóraǵalary men sýdıalary tanystyryldy.
Máselen, Almaty qalalyq sot júıesinde birqatar taǵaıyndaýlar oryn aldy.
Qalalyq sot tóraǵasy Aqjan Eshtaı jańadan taǵaıyndalǵan aýdandyq jáne oǵan teńestirilgen sot tóraǵalaryn tanystyrdy.
Almaty mamandandyrylǵan aýdanaralyq ekonomıkalyq sotynyń tóraǵasy laýazymyna buryn Astana qalalyq sotynyń sýdıasy bolyp qyzmet atqarǵan Dáýlen Jumauly Balyqov taǵaıyndaldy. Buryn mamandandyrylǵan aýdanaralyq ekonomıkalyq sotynyń tóraǵasy qyzmetin atqarǵan Janat Sákibaıuly Bekjanov Bostandyq aýdanynyń №2 aýdandyq sotynyń tóraǵasy bolyp taǵaıyndaldy. Bostandyq aýdanynyń №2 aýdandyq sotynyń tóraǵasy qyzmetin atqaryp kelgen Arman Jumabaıuly Shámshıev Qostanaı oblystyq sotynyń qylmystyq ister jónindegi apelásıalyq sot alqasynyń tóraǵasy qyzmetine aýysty. Olardy taǵaıyndaý jónindegi Jarlyqqa Qazaqstan Respýblıkasynyń Prezıdenti 2014 jyldyń 24 jeltoqsanynda qol qoıdy.
5 qańtar kúni Jambyl, Qostanaı, Shyǵys Qazaqstan, Batys Qazaqstan oblystyq sottarynda jáne Almaty qalalyq sotynda Qazaqstan Respýblıkasy Prezıdentiniń 2014 jylǵy 24 jeltoqsandaǵy Jarlyǵyna sáıkes jańadan taǵaıyndalǵan oblystyq jáne oǵan teńestirilgen sottardyń tóraǵalary men sýdıalary tanystyryldy, dep habarlady Joǵarǵy sottyń baspasóz qyzmetinen.
Almaty qalasy mamandandyrylǵan aýdanaralyq ekonomıkalyq sotynyń tóraǵasy laýazymyna - Daýlen Balyqov, Bostandyq aýdanynyń №2 aýdandyq sotynyń tóraǵasy bolyp, Janat Bekjanov taǵaıyndaldy.
Batys Qazaqstan oblystyq sotynyń sýdıasy laýazymyna Oral qalalyq №2 sotynyń sýdıasy qyzmetin atqarǵan Dáýletqalıeva Ǵalıa Manarbekqyzy taǵaıyndaldy.
Qostanaı oblysynyń sot qaýymdastyǵyna oblystyq sottyń qylmystyq ister jónindegi apelásıalyq sot alqasynyń jańa tóraǵasy Shámshıev Arman tanystyryldy.
Jambyl oblystyq sotynyń tóraǵasy M.Bekturǵanov sot ujymyna mamandandyrylǵan aýdanaralyq ekonomıkalyq sotynyń tóraǵasy qyzmetine taǵaıyndalǵan Sembek Baımahanovty, Qordaı aýdandyq sotynyń tóraǵasy Saken Turǵynbaevty, Taraz qalalyq №2 sotynyń sýdıasy Ernar Jamanqulovty resmı túrde tanystyrdy.
Shyǵys Qazaqstan oblystyq sotynyń tóraǵasy A.Rahmetýlın ujymǵa Shemonaıha aýdanynyń mamandandyrylǵan ákimshilik sotynyń tóraǵasy qyzmetine taǵaıyndalǵan Sársenbaev Sanatty, Besqaraǵaı aýdandyq sotynyń tóraǵasy Ábdirahmanov Áriphandy, Shyǵys Qazaqstan oblystyq sotynyń sýdıasy Qaıyrbaeva Laýrany tanystyrdy.
Qyzylorda qalasynyń mamandandyrylǵan ákimshilik sotynyń tóraǵasy bolyp Meırambek Ibrashevti taǵaıyndalǵan.
Qaraǵandy oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń tóraǵasy laýazymyna Dáýren Túsiphanuly Saıhanov taǵaıyndaldy.
Aqmola oblystyq sotynyń tóraǵasy N.Ábdiqanov oblystyń sýdıalar qaýymdastyǵyna qylmystyq ister jónindegi apelásıalyq sot alqasynyń jańa tóraǵasyn jáne oblystyń jergilikti sottarynyń jańadan taǵaıyndalǵan tóraǵalaryn tanystyrdy.
Qazaqstan Respýblıkasy Prezıdentiniń 2014 jylǵy 24 jeltoqsandaǵy №983 Jarlyǵyna sáıkes, Aqmola oblystyq sotynyń qylmystyq ister jónindegi apelásıalyq sot alqasynyń tóraǵasy qyzmetine - Berdiǵulova Janna, Sandyqtaý aýdandyq sotynyń tóraǵasy qyzmetine - Aımuhamedov Azamat, Býrabaı aýdanynyń mamandandyrylǵan ákimshilik sotynyń tóraǵasy qyzmetine - Temirov Janat, mamandandyrylǵan aýdanaralyq ekonomıkalyq sotynyń tóraǵasy qyzmetine - İztaev Erǵalı jáne Shortandy aýdandyq sotynyń tóraǵasy qyzmetine - Beısekeev Qanat taǵaıyndaldy.
Sondaı-aq Aqtóbe oblystyq sotynda oblystyq sot sýdıalarynyń jalpy otyrysynda atalǵan Jarlyqqa sáıkes taǵaıyndalǵan sot tóraǵalary men sýdıalar ujymǵa tanystyryldy. Jalpy otyrysta Alǵa aýdandyq sotynyń tóraǵasy laýazymyna - Isdáýir Muratqanov, Aqtóbe qalasynyń mamandandyrylǵan ákimshilik sotynyń tóraǵasy laýazymyna - Erǵalı Ernazarov, oblystyq sottyń sýdıasy laýazymyna - Gúlnar Ibraımova, Aqtóbe qalasynyń №2 sotynyń sýdıasy laýazymyna - Álıa Bektalıeva tanystyryldy.
Jambyl oblysynda jańadan birqatar sot basshylary taǵaıyndaldy, dep habarlaıdy oblystyq sottyń baspasóz qyzmetinen.
Atap aıtqanda, Qazaqstan Respýblıkasy Prezıdentiniń 2014 jylǵy 24 jeltoqsandaǵy Jarlyǵymen Jambyl oblysy boıynsha mamandandyrylǵan aýdanaralyq ekonomıkalyq sotynyń tóraǵasy qyzmetine buryn Qyzylorda oblystyq sotynyń sýdıasy bolǵan Sembek Baımahanov pen Qordaı aýdandyq sotynyń tóraǵasy qyzmetine buryn Ońtústik Qazaqstan oblysynyń Saıram aýdandyq sotynyń tóraǵasy bolǵan Sáken Turǵynbaev taǵaıyndaldy. Al Qordaı aýdandyq sotynyń tóraǵasy Ernar Jamanqulov Taraz qalalyq №2 sotynyń sýdıasy laýazymyna taǵaıyndaldy.
Batys Qazaqstan oblystyq sotynyń sýdıasy bolyp QR Prezıdentiniń sáıkes Jarlyǵymen Ǵalıa Manarbekqyzy Dáýletqalıeva taǵaıyndaldy.
Shyǵys Qazaqstan oblystyq sotynyń tóraǵasy A.Rahmetýlın Shemonaıha aýdanynyń mamandandyrylǵan ákimshilik sotynyń jáne Besqaraǵaı aýdandyq sotynyń jańa tóraǵalaryn tanystyrdy.
Qazaqstan Respýblıkasy Prezıdentiniń 2014 jyldyń 24 jeltoqsanyndaǵy № 983 Jarlyǵyna sáıkes, Shemonaıha aýdanynyń mamandandyrylǵan ákimshilik sotynyń tóraǵasy qyzmetine - Sársenbaev Sanat Slámjanuly, Besqaraǵaı aýdandyq sotynyń tóraǵasy qyzmetine - Ábdirahmanov Áriphan Arynuly, Shyǵys Qazaqstan oblystyq sotynyń sýdıasy laýazymyna - Qaıyrbaeva Laýra Erkinqyzy taǵaıyndaldy.
Sport:
Birer kún buryn AIBA vıse-prezıdenti, Azıa boks federasıasynyń prezıdenti Serik Qonaqbaev aldaǵy tórt jylǵa sportshylar men jastardyń isi boıynsha AIBA komısıasynyń tóraǵasy bolyp taǵaıyndaldy.
AIBA prezıdenti Chıng Kýo Výo Qonaqbaevty osy laýazymǵa taǵaıyndalýymen quttyqtap, onyń bul jaýapty qyzmetke laıyqty ekendigin atap ótti.
«Sizdiń boksshy retindegi úlken jetistikterińiz, sondaı-aq boks salasyndaǵy tereń bilimińiz bul mindetti tabysty oryndaýǵa kómektesetini sózsiz», - dep qosyp ótti Chıng Kýo Výo.
Úlken aýys-túıisterdiń biri Qaraǵandynyń «Shahter» klýbynda oryn aldy. Atap aıtqanda, «Shahter» FK-nyń jańa dırektory taǵaıyndaldy. Bul qyzmetti Jarylǵapov Nurǵazy Ǵalymuly atqaratyn boldy.
Jarylǵapov Nurǵazy Ǵalymuly 1963 jyly týǵan. Bokstan QR eńbek sińirgen bapkeri, E.A.Bóketov atyndaǵy QarMÝ-diń qurmetti profesory, mamandyǵy boıynsha zańger, ekonomıs, pedagog. Nurǵazy Jarylǵapov SHQO, Qostanaı, Qaraǵandy oblystary boıynsha keden basqarmalaryn basqarǵan, QR Keden komıteti tóraǵasynyń orynbasary bolǵan. Qaraǵandy oblystyq týrızm, dene shynyqtyrý jáne sport basqarmasyna jetekshilik etken.
Qazirgi ýaqytta atalmysh klýb oıynshylarynyń negizgi quramy men jattyqtyrýshylar toby Túrkıadaǵy oqý-jattyǵý jıyndaryna attandy. Halılın Erden Baltabaıuly ózge qyzmetke aýysýyna baılanysty bul orynnan bosatyldy.
«Aqtóbe» FK bas dırektorynyń mindetin atqarýshy bolyp Ǵalymbek Qurmanseıit taǵaıyndaldy.
32 jastaǵy Ǵalymbek Qojaǵalıuly Qurmanseıit bes jyldan astam «Aqtóbe» FK qurylymynda jumys isteýde. Buryn ol bas dırektordyń orynbasary qyzmetin atqarǵan. Eske sala keteıik, osyǵan deıin bul qyzmette Bıhambetova Shárıpa Shaıqamalqyzy bolǵan.
Aqtóbe qalasynyń ákimi Erhan Omarovtyń buıryǵymen dene shynyqtyrý jáne sport bólimi basshysynyń mindetin atqarýshy bolyp kir tasyn kóterý sporty boıynsha 12 dúrkin álem chempıony jáne 20 dúrkin Qazaqstan chempıony, sport sheberi Evgenıı Goncharov taǵaıyndaldy.
Evgenıı Goncharov Q. Jubanov atyndaǵy Aqtóbe memlekettik ýnıversıtetin támamdaǵan. Oblystyq balalar men jasóspirimder sport mektebinde velosport boıynsha jattyqtyrýshy-oqytýshy, «Kóktas-Aqtóbe» AQ fıtnes-ortalyǵynyń basqarýshysy, «Alataý korporasıasy» JSHS bas dırektorynyń orynbasary, «Astarta-Zapad» JSHS dırektory bolyp qyzmet etken.
33 jastaǵy Evgenıı Goncharov elimizdiń, Azıa, Eýropa jáne álemniń úzdik kir tasyn kóterýshileriniń biri.
Bul qyzmette bolǵan İskenderbek Mahanov 2014 jyldyń jeltoqsanynda oblys ákiminiń buıryǵymen Aqtóbe oblystyq dene shynyqtyrý jáne sport basqarmasynyń basshysy bolyp taǵaıyndaldy.
Áıelder kúresinen QR ulttyq quramasynyń jattyqtyrýshylyq quramynda ózgeris boldy. Atalǵan QR quramasynyń burynǵy bas jattyqtyrýshysy Gózel Manúrovanyń ornyna bul qyzmetke jastar quramasynyń tálimgeri Qaırat Saǵadıev keldi.
Gózel Manúrova eldiń bas komandasyn London qalasyndaǵy Olımpıadadan keıin basqardy. Esterińizge sala keteıik, G.Manúrova Anglıa astanasynan qola júldemen oralǵan.
«Qazirgi ýaqytqa deıin ataqty sportshy jattyqtyrýshylyq qyzmetin resmı jarystarmen qatar júrgizdi. Bas jattyqtyrýshy bolyp eki jarym jyldaı ýaqyt jumys istedi. Gózel Manúrova áıelderdiń ulttyq quramasynda jetekshi atlet jáne endi Rıo-de-Janeıro qalasynda ótetin tórtjyldyqtyń basty jarystaryna tolyq deńgeıde daıyndalýǵa barynsha nıet qoıa alady», - deıdi QR grek-rım, erkin kúres jáne áıelder kúresi federasıasy.
«Bul - alqa sheshimi. Sportshy ári komandanyń bas jattyqtyrýshysy qyzmetterin birge alyp júrý, árıne, ońaı emes. Óz aldyma mynadaı maqsat qoıdym - 2016 jyly ótetin Olımpıadada tabysty shyǵý. Endi maqsatty daıyndalyp, jankúıerlerimizdiń senimin aqtaýǵa tyrysamyn. Óz tarapymnan sol úshin qoldan keletinniń bárin jasaımyn. Qaırat Saǵadıevke alǵa qoıǵan mindetterine qol jetkizýdi jáne jaqsylyqtyń barlyǵyn tileımin», - dep atap ótti Gózel Manúrova.
Ulttyq quramanyń jańa bapkeri Qaırat Saǵadıevtiń názik jandylarmen jumys jasaýda birshama tájirıbesi bar.
«Ol QR jasóspirimder men jastar komandalarynyń aǵa jattyqtyrýshysy bolyp, qaramaǵynda bolǵan sportshylarmen birge jaqsy nátıjelerge qol jetkizgen: ótken jylǵy Azıa chempıonatynda bizdiń jastarymyz bes medaldi (bir altyn, bir kúmis, úsh qola) qanjyǵasyna baılap, qorytyndy beıresmı esepte ekinshi orynnan kóringen. Álem chempıonatynda Saǵadıevtiń qamqorlyǵyndaǵy sportshylar bir kúmis pen bir qola medaldi jeńip aldy»,delingen habarlamada.
QR jastar quramasynyń aǵa jattyqtyrýshysy bolyp Ádilet Ermakovtyń taǵaıyndalǵanyn atap óteıik. Osyǵan deıin ol jasóspirimder quramasynda boıjetkendermen jumys istegen. Jasóspirimder komandasyn endi Murat Jumabaev basqardy. Buǵan deıin ol uzaq ýaqyt boıy OQO áıelder quramasynyń aǵa jattyqtyrýshysy qyzmetin atqaryp keldi.
Avtor: Jasulan Joldybaev, IA QazInform
