Bir baı kisi dúnıe salar aldynda ulyn shaqyryp alyp:

— Ulym, men ólgen soń juma saıyn qyz al, ár qalaǵa úı sal, as jeseń bal je!- dep ósıet etipti. 
Baı dúnıeden ótip, uly ákesiniń ósıetin oryndaı bastaıdy. Juma saıyn qyz alyp, ár qalaǵa úı salyp, tek bal jep, bar dúnıesin bitiredi. "Endi ne isteımin?" dep muńaıyp, bir tastyń ústine otyra ketedi. Arada birshama ýaqyt ótkende bir aqsaqal kelip jigitke sálem beredi de, áńgimege tartady:

— Ne istep otyrsyń? -Jáı otyrmyn.

— Shynyńdy aıt! Júzińde bir muń bar ǵoı, shyraǵym!- deıdi qarıa. 
Jigit eshteńe aıtqysy kelmegenimen, aqsaqal:

—Syryńdy jasyrma! Bálkim, bir kómegim tıip qalar,- deıdi.

—Meniń ákem baı edi, sol kisiniń ósıetin oryndaımyn dep kedeı boldym. -Ne dep aıtqan edi? -Ákem: "Men ólgen soń juma saıyn qyz al",- dep edi, men ákemniń ósıetin oryndadym. Ekinshi: "Ár qalaǵa úı sal",- dep edi. Men ár qalaǵa úı saldym. Úshinshi: "As ishseń, bal je",- dep edi. Men bul ósıetin de oryndap, ár kúni bal jedim. Osylardy atqaramyn dep júrgende barlyq aqsham taýsyldy,- deıdi. 
Sonda qarıa jigitke qarap:

— Sen ákeńniń ósıetin túsinbegen ekensiń. "Juma saıyn qyz al" degeni: "Áıelińmen syılas bol, qadirińdi ketirme. Sonda ǵumyr boıy tatý-tátti ómir súresiń!" degeni. "Ár qalaǵa úı sal" degeni: "Ár qalada dostaryń bolsyn, barǵanda qonatyn" degeni edi. "As jeseń, bal je" degeni: "Eńbek etip, as ishseń - baldan tátti bolady" degeni edi,- dep qart óz jónine ketipti. Jigit ákesiniń tereń maǵynaly ósıetin sonda ǵana uqqan eken...