Úkimet basshysy Baqytjan Saǵyntaev búgin Astanada ótken halyqaralyq forým barysynda sheteldik ınvestorlarǵa osyndaı ýáde berdi.

2020 jylǵa deıin ınvestor úshin biraz sharýa sheshilmek.Kez-kelgen memlekettik organ sheteldik kásipkerdiń saýalyna qysqa merzimde úsh tilde jaýap qatýy tıis. Qazaqstandaǵy bıznesi úshin elektrondy vıza alyp, shekaradan da jeńil ótedi. Sondaı-aq kedendik kodekste ınvestorǵa jeńildik qarastyrylǵan. Bir sózben bizdiń ekonomıkaǵa aqsha quıǵysy kelgenderge jaqsy emes, óte jaǵdaı jasalady. Bul týraly KTK jańalyqtary aıtty.

-Sizderdiń árbir ótinishterińizge memlekettik organdar 10 jumys kúni ishinde aǵylshyn tilinde jaýap beredi. Alaıda sizder qazaqsha ne oryssha surasańyzdar sol tilderde de jaýap bere alamyz. Eń bastysy 10 kúnnen keshiktirilmeıdi. Sondaı-aq halyqqa qyzmet kórsetý ortalyqtary, aýrýhana, bilim mekemeleri, kóshi-qon jáne salyq organdaryna aǵylshyn tilin meńgergen mamandar alamyz, - dedi QR Premer-mınıstri Baqytjan Saǵyntaev.

Aıta keteıik, 5 jeltoqsanda Qazaqstan Úkimeti Indýstrıalandyrý kúni qarsańynda QR Premer-mınıstriniń basshylyǵymen 100-den astam iri halyqaralyq kompanıalardyń ókilderimen Qazaqstanǵa ınvestısıa salýdyń ózekti máselelerin talqylady, dep habarlaıdy Qamshy.kz aqparat agenttigi.

Premer-Mınıstr Baqytjan Saǵyntaevtyń aıtýynsha, sharanyń basty maqsaty — Qazaqstanǵa «jańa býynnyń» ınvestısıalaryn tartý prosesin yntalandyrýdyń aýqymdy ári ornyqty strategıasyn qalyptastyrý.

Kúni boıy 100-den astam halyqaralyq kompanıalar, qarjylyq uıymdar, elshilikter, úkimettik emes uıymdar, álemniń 30 elinen kelgen sheteldik BAQ ókilderi memlekettik jáne kvazımemlekettik sektorlardyń basshylarymen, elimizdiń jetekshi bıznesmenderimen ınvestısıalyq usynystar men iskerlik perspektıvalardy qarastyrýda.

«Qazaqstandaǵy ekonomıkalyq reformalar baǵdarlamasy: syn-tegeýirinder men múmkindikter» plenarlyq sesıasy barysynda Baqytjan Saǵyntaev forým qatysýshylaryna eldegi ınvestısıalyq ahýaldy damytý boıynsha qabyldanyp jatqan sharalar men ınvestorlarǵa jasalyp jatqan múmkindikter týraly aıtyp berdi.

Birinshiden, Qazaqstan ekonomıkalyq ósim jolyna tústi. Qabyldanǵan is-sharalardyń nátıjesinde 2017 jyldyń 10 aıyndaǵy JİÓ ósimi 4% qurady. Jekemenshik ınvestısıalar men halyqtyń tutynýshylyq belsendiligi qalypqa kelýde.

Ekinshiden, jańa aýqymdy reformalardy iske asyrý (konstıtýsıalyq reforma, rýhanı jańǵyrý, ekonomıkalyq ósimniń jańa modeli) elimizdiń damýdyń jańa kezeńine aıaq basqanyn bildiredi jáne Qazaqstannyń álemniń ozyq damyǵan 30 eline qosylý jaǵdaıyna edáýir septigin tıgizedi.

Úshinshiden, Qazaqstannyń úshinshi jańǵyrýy aıasyndaǵy jappaı tehnologıalyq jańǵyrý ınvestorlarǵa ekonomıkanyń túrli sektorlarynda jańa múmkindikter ashady: metalýrgıa, mashına jasaý, AÓK jańǵyrtý, óńdeý jáne azyq-túlik ónerkásibi jáne t. b.

Tórtinshiden, mańyzdy álemdik naryqtarǵa shyǵýdyń únemi damý ústindegi kóliktik-logıstıkalyq «jol» elimizdiń bıznes úshin tartymdylyǵyn arttyrady. Infraqurylymǵa salynyp jatqan ınvestısıalar jyldam ósýshige aınalýda.

Besinshiden, Qazaqstan ınovasıalyq jańalyqtardy ýaqytynda engizedi. Ekonomıkanyń negizgi salalaryn tehnologıalyq jańartyp, sıfrlandyrýdyń jol kartasy ázirlendi, múddeli seriktestermen birlesip kásiporyndarda, onyń ishinde ónerkásiptik óndiristerde eńbek ónimdiligin aıtarlyqtaı arttyrý kózdelgen.

Altynshydan, ınvestorlar Qazaqstannyń ıntegrasıalyq saıasatynyń arqasynda iri naryqtarǵa qol jetkize alady. Eýrazıalyq ekonomıkalyq odaq  aıasyndaǵy ıntegrasıa ınvestorlarǵa eleýli perspektıvalar ashady.

Jetinshiden, zańnamalyq baza jetildirilýde. Astana halyqaralyq qarjy ortalyǵy — halyqaralyq bırjalarmen birlesýdiń zamanaýı qarjy quraly ǵana emes, sondaı-aq, ınvestorlar týyndaǵan daýlarda sot isin aǵylshyn tilinde júrgizý arqyly brıtandyq quqyqtyń qaǵıdalary men normalaryna sáıkes sheshe alatyn Ortalyq. 2018 jylǵy 1 qańtardan bastap, kez kelgen ınvestor eksaýmaqtylyq qaǵıdasy boıynsha óz jobasynyń el aýmaǵynyń qaı jerinde iske asyrylýyna qaramastan, AHQO-ǵa júgine alady.

Segizinshi, memlekettiń naryqtaǵy úlesin tómendetý. 902 kompanıa básekeles ortaǵa beriledi. Sonymen qatar ınvestorlar jekeshelendirýdiń ekinshi aýqymdy «tolqynyna» qatysa alady.

Baqytjan Saǵyntaev óz baıandamasynda «PriceWaterhouseCoopers jáne Dúnıejúzilik banktiń esebine sáıkes, Qazaqstan búginde salyq ahýalynyń qolaılylyq deńgeıi boıynsha 189 eldiń ishinde 18-shi orynǵa ıe» ekenin atap ótti.

Sondaı-aq, Qazaqstan Dúnıejúzilik banktiń Doing Business reıtıńisinde álemniń 190 eli arasynda 36-orynǵa ıe. Reıtıńtiń barlyq 10 ındıkatory boıynsha jaqsy kórsetkishterge qol jetkizildi: «Mınorıtarlyq ınvestorlardy qorǵaý» ındıkatory boıynsha birinshi orynda, «Kelisimsharttardy oryndaý» kórsetkishi boıynsha – altynshy orynda. Qazir Úkimet Doing Business reıtıńinde odan da joǵary oryndarǵa ıe bolý máselesin sheshýde. Osy maqsatta ulttyq jáne sýbulttyq deńgeılerde bıznes júrgizý jaǵdaılaryn jaqsartý úshin jańa, jetinshi zańnamalyq túzetýler paketi daıyndaldy.

Premer-Mınıstr Baqytjan Saǵyntaev sonymen qatar Qazaqstan Úkimeti ınvestorlar úshin barynsha qolaıly jaǵdaı jasaý saıasatyn ustanatynyn málimdedi. Atalǵan baǵytta 2017 jyly jańa ulttyq ınvestısıalyq strategıa qabyldanyp, iske asyrylýda, sonymen qatar sheteldik jáne aımaqtyq qurylymdar jelisimen «Kazakh Invest» ulttyq kompanıasy jumys isteýde. Budan ózge, mańyzdy elderde Qazaqstan elshilikterinde elshilerdiń ınvestısıalar jónindegi keńesshileri taǵaıyndalady.

Jeke retinde — eksport ónimderin óndirýshilerdi qoldaý úshin arnaıy eksporttyq strategıa jáne «Kazakh Export» ulttyq kompanıasy quryldy.

El Úkimeti sonymen qatar ınvestısıalardy damytý jáne kásipkerlik salasynda birqatar túbegeıli sharalardy qabyldady.

«Bıznesti retteýsizdendirý» baǵyty boıynsha:

— shaǵyn jáne orta bıznesti tekserýge qoıylatyn talaptar 60%-ǵa azaıdy;

— lısenzıalar men ruqsattar sany 3 eseden astamǵa qysqartyldy;

— salyq organdarynyń josparly tekserýleri 40%-ǵa qysqartyldy.

Búrokratıany tómendetý jáne E-government veb-portaly arqyly memlekettik qyzmetterdi arttyrý baǵyty boıynsha:

— Adal salyq tóleýshilerdiń múddelerin qorǵaý jańa Salyq kodeksiniń jobasynda bekitilgen;

— jer qoınaýy jáne jer qoınaýyn paıdalaný týraly jańa kodekste qatty paıdaly qazbalar boıynsha 18 aıdan 10 kúnge deıin jer qoınaýyn paıdalaný quqyǵyn berý ýaqytyn qysqartýǵa múmkindigi engizildi;

— taýarlardy shyǵarý ýaqyty alty esege, 4 saǵatqa deıin azaıtýǵa múmkindik beretin deklarasıany elektrondy túrde berý basymdyǵy Keden kodeksinde bekitildi;

— Erkin ekonomıkalyq jáne ındýstrıaldy aımaqtardy retteý týraly zań jobasynda ruqsat berý rásimderin jeńildetý jáne ınvestorlar úshin múmkindikter qarastyrylǵan.

Investısıalyq ahýaldy jaqsartýdaǵy jergilikti atqarýshy organdar jumysynyń mańyzdy ekenin aıta ketken Baqytjan Saǵyntaev bıylǵy jyldan bastap bıznesti júrgizýdiń qolaılyǵy boıynsha óńirlerdi baǵalaıtyn jańa reıtıń engizilgenin atap ótti. Negizgi nazar ınvestorlardyń quqyqtaryn qorǵaýdy kúsheıtýge, ónerkásiptik nysandarǵa jer telimderin berý rásiminde ashyqtyqty qamtamasyz etýge aýdarylǵan.

Qazaqstannyń úshinshi jańǵyrýy mindetterin sheshý úshin «jańa býyn» kásipteri boıynsha sheteldik jumys kúshin tartý tásilderin yryqtandyrýǵa jáne memlekettik-jekeshelik áriptestik rásimderin jeńildetýge erekshe kóńil bólinedi.

2018 jyly Úkimettiń jumysy jeke menshikke beriktikti, zań ústemdigin jáne transparenttilikti qamtamasyz etý qaǵıdattaryna negizdeletin bolady. Sonymen qatar ulttyq zańnamaǵa EYDU-ǵa múshe elderdiń usynystaryn, standarttaryn jáne tájirıbelerin engizý boıynsha arnaıy Jol kartasy iske asyrylatyn bolady.

Baıandamasynyń sońynda Premer-Mınıstr Baqytjan Saǵyntaev Úkimettiń bızneske eń jaqsy jaǵdaılardy jasaý týraly sheshimin naqtyraq aıtyp ótti. Bul:

— Memlekettik organdardyń ınvestorlarǵa usynylatyn konsýltasıalyq qyzmetterin kúsheıtý – suraý boıynsha jaýap 10 jumys kúni ishinde aǵylshyn tilinde beriledi.

— 2020 jyldan bastap sheteldik ınvestorlarǵa memlekettik qyzmetter aǵylshyn tilinde usynylatyn bolady.

— ınvestorlar úshin barlyq negizgi normatıvtik-quqyqtyq aktiler Ádilet mınıstrliginiń, Syrtqy ister mınıstrliginiń veb-saıttarynda jáne «Kazakh Invest» ulttyq kompanıasynyń saıtynda aǵylshyn tilinde jarıalanady.

— sheteldik ınvestorlarǵa elge kirýge jaǵdaı jasaý — elektrondyq vıza engizý, shekaradan ótý, kóshi-qon esebine alý men qaýipsizdik máseleleri jaqsartylady.

Sonymen qatar, búgin «Qazaqstannyń óndiristik-ekonomıkalyq jáne áleýmettik ınfraqurylymyna jeke ınvestısıalar» taqyrybyna arnalǵan paneldik pikirtalas kezinde Eýropa men Azıany baılanystyratyn el retinde Qazaqstannyń tranzıttik áleýeti máseleleri talqylandy.

«Indýstrıa 4.0 — Qazaqstannyń ekonomıkalyq jańǵyrýynyń jańa kezeńi» paneldik pikirtalasy barysynda ónerkásiptik ınternetti, 3D baspany, robot tehnıkasyn, aýqymdy málimetterdi taldaýdy, jasandy ıntellekti, mashınalyq oqytýdy t.s.s. paıdalanýmen baılanysty ozyq tehnologıalyq jobalardy kásiporyndarǵa engizý múmkindikteri talqylandy. Pikirtalas qatysýshylary tehnologıalardy zańnamalyq deńgeıde engizýdi retteý máselelerine egjeı-tegjeıli toqtaldy.