Memleket basshysy Nursultan Nazarbaevtyń qatysýymen «Jańa ındýstrıalandyrý: qazaqstandyq barystyń qadamy» ulttyq telekópiri bastaldy. Shara barysynda onlaın rejıminde búkil el boıynsha jańa ındýstrıalyq-ınnovasıalyq, ınfraqurylymdyq, energetıkalyq, agroónerkásiptik jobalar iske qosylmaq, dep habarlaıdy Qamshy.kz aqparat agenttigi.

Atap aıtqanda, «Qazaqaltyn Tehnolodjı» kompanıasy Aqsý aýylynda altyn óndirý fabrıkasyn iske qospaq. Aqtóbe oblysynda mashına jasaý jáne metal óńdeý sektorynda munaı-gaz jabdyqtaryn óndirý jáne qubyrlar shyǵarýmen aınalysatyn «Qazaqstan munaı jabdyqtary zaýyty» JSHS zaýyty ashylady. Atyraý oblysynda («Jigermunaıservıs» JSHS) robotty dánekerleý ádisimen metal qurastyrmalary óndirisi jumysyn bastaıdy.

Tamaq ónerkásibinde jáne aýylsharýashylyq ónimderin qaıta óńdeýde Soltústik Qazaqstan oblysyndaǵy «Maslodel» JSHS «Tetra Pak» JSHS joǵary tehnologıalyq qondyrǵylarmen jabdyqtalǵan sút zaýytyn ashady. Jambyl oblysynda «Shaǵyn jáne orta bıznesti damytýdyń jańa sektorlary» baǵyty boıynsha «Orgstroı» JSHS granıt, mármár jáne gıps óndirý, jarylǵysh qurylǵylardy óndirýdiń jańa tehnologıasyn óńdeý jónindegi óndirisin iske qosty. Qaraǵandy oblysynda eski kólikterdi qaıta óńdeýmen aınalysatyn kásiporyn «Recycling Company» JSHS jumys isteı bastamaq. Kásiporyn jylyna tozyǵy jetken avtokólikterdiń 50 myńyn qaıta óńdeýge qaýqarly.

Sondaı-aq, Astanadaǵy jalpyulttyq telekópir barysynda Eýropalyq avıasıalyq qaýipsizdik agenttiginiń standarttaryna sáıkes óz avıalaınerleri men basqa da áýe kompanıalarynyń  ushaqtaryna tehnıkalyq qyzmet kórsetetin «Eır Astana» avıasıalyq tehnıkalyq ortalyǵy jumys isteı bastaıdy.

Aıta keteıik, 2017 jyldyń basynan beri 1,9 trıllıon teńgelik 127 joba iske qosylyp, 10 myńnan astam turaqty jumys orny ashyldy.