Astanada ótip jatqan ulttyq telekópir barysynda "Intergaz Ortalyq Azıa" AQ Aqtóbe oblysyndaǵy "Bozoı" qoımasynda gaz keptirý qondyrǵysyn iske qosty, dep habarlaıdy Qamshy.kz aqparat agenttigi.

"Intergaz Ortalyq Azıa" AQ "Bozoı" qoımasynda gazdy keptirý qondyrǵysyn iske qosty. Joba Reseı, Qytaı men Ózbekstanǵa tasymaldanatyn gaz tranzıtiniń eksporttyq kólemin ulǵaıtýǵa, gazdy qurǵatý jáne tazalaý qondyrǵysy strategıalyq mańyzdy "Bozoı" gaz qoımasynyń tıimdiligin arttyrýǵa múmkindik beredi. Jańa qondyrǵy gaz ótkizý kólemin táýligine 27 mln tekshe metrge jetkizedi. Bul ońtústik pen batystaǵy qazaqstandyq tutynýshylardy úzdiksiz gazben qamtamasyz etýge múmkindik bermek.

Memleket basshysy "Intergaz Ortalyq Azıa" AQ atalǵan jobany iske qosý arqyly el úshin mańyzdy dúnıeni sheshkenin atap ótti.

"Ózderińiz bilesizder, biz munaı men gazdy shyǵaratyn memleket bola tura, sol gazǵa táýeldi bolyp keldik. Birese Reseıden, birese ońtústigimizden. Qysta ońtústigimizdegi qazaqtardyń bári tońyp-jaýrap, qaıdan gaz alamyz dep, úkimet bolyp, el bolyp surap júrdik. Endi, mine, qazir sodan shyǵý úshin biz bul máseleni sheshtik.  Myna qubyr óte qajet. Eldi gazdandyrý úshin ǵana emes, eksportqa shyǵaratyn gazǵa ıe boldyq. Bolashaqta Qashaǵannan, Qarashyǵanaqtan shyǵatyn gaz bar, kólemi 70-80 mıllıardqa jetken kezde, gazdy eksporttaýshy el bolamyz. Bul bir. Ekinshiden, ol gazdy qurǵaq túrinde bermeı, óńdep, sol gazdan shyǵaratyn ónimderdi kóbeıtýimiz qajet. Sondyqtan, sizder el úshin óte mańyzdy dúnıeni sheshtińizder. Eńbekterińiz tabysty bolsyn", — dedi Elbasy.