Álemdegi eń iri Facebook áleýmettik jelisi birinshi kópshilik usynys (IPO) aıasynda qundy qaǵaz úshin 38 dollar deńgeıinde, ıaǵnı buǵan deıin belgilengen 34-38 dollar sheńberinde baǵalanyp otyr. Al kompanıanyń ózi 104 mıllıard dollarǵa baǵalandy.

RIA Novostı aqparatyna qaraǵanda, usynystar qorytyndysy boıynsha Facebook-tiń 421,23 mıllıon qarapaıym aksıalary erkin aınalymda bolady. Onyń ishinde 180 mıllıondy kompanıanyń ózi, al qalǵan 241,23 mıllıonyn aksıonerler satýda. Osylaısha, satýshy taraptar IPO barysynda ózderine 16 mıllıard dollar tartty. Kompanıa aktıvi shamamen 104 mıllıard dollar aldy. 421,23 mıllıondaǵy IPO kólemine 63 mıllıonnan artyq emes baǵaly qaǵazdar kirmeıdi. Olardy 30 kúnniń ishinde IPO uıymdastyrýshylary – bankter qosymsha satýy múmkin. Sony qosa eseptegende, IPO kólemi 18,4 mıllıard dollardy quraýy múmkin. Facebook aksıalary tehnologıalyq kompanıalar arasynda tanymal NASDAQ amerıkalyq bırjasynda «FB» degen belgimen 18 mamyrdan bastap satyla bastaıdy. Facebook basshysy Mark Sýkerberg IPO-dan keıin daýys berýshi kompanıa aksıasynyń shamamen 55,8 %-yn baqylaıdy, ol buǵan deıin josparlanǵannan 1,5%-ǵa tómen. Facebook-ti alǵash satylymǵa shyǵarý AQSH tarıhynda Visa men General Motors-tan keıingi úshinshi iri IPO bolady. Salystyratyn bolsaq, Google ǵalamtor kompanıasy 2004 jyly óziniń IPO-ǵa kirýi kezinde 23,1 mıllıard dollarǵa baǵalandy, al ótken jyly ınvestorlar Groupon jeńildik qyzmetin 12,7 mıllıard dollarǵa, Zynga-ny -7 mıllıard dollarǵa, LinkedIn júıesin tek 4,3 mıllıard dollarǵa baǵalady. Eýrazıa birinshi arnasy