Syrtqy ister mınıstri Qaırat Ábdirahmanov Ulybrıtanıa jáne Soltústik Irlandıa Birikken Koróldiginiń Qazaqstandaǵy Elshisi Kerolın Braýnǵa Qazaqstan Respýblıkasynyń Qurmet gramotasyn tabys etti, dep habarlaıdy Qamshy.kz aqparat agenttigi QR SİM baspasóz qyzmetine silteme jasap.

Memleket basshysy Nursultan Nazarbaevtyń K. Braýndy marapattaý týraly Jarlyǵyna sáıkes, Elshi Qazaqstan Respýblıkasy men Ulybrıtanıa arasyndaǵy jemisti yntymaqtasty damytýǵa sińirgen eńbegi úshin Qurmet gramotasyna ıe boldy.

Q. Ábdirahmanov tıimdi árekettestik pen saıası dıalogtyń damýyna, sondaı-aq eki el arasyndaǵy ekonomıkalyq yntymaqtastyq pen mádenı baılanystardy nyǵaıtýǵa qosqan eleýli úlesi úshin Qazaqstandaǵy dıplomatıalyq mısıasyn tamamdap jatqan K.Braýnǵa alǵysyn bildirdi. Elimizdiń Londondaǵy Elshiligimen tyǵyz yqpaldastyqtyń nátıjesinde brıtandyq dıpmıssıanyń basshysy Qazaqstandy Ulybrıtanıanyń Ortalyq Azıa elderiniń ishindegi strategıalyq áriptes retindegi mártebesin bekitýge járdemdesti.

«K. Braýnnyń 5 jylǵa jýyqtaǵan qyzmeti barysynda Qazaqstan men Ulybrıtanıa arasyndaǵy qarym-qatynastar jańa sapaly deńgeıge kóterildi, joǵary deńgeıdegi saparlar uıymdastyryldy. Belsendi saıası dıalog pen iskerlik toptardyń baılanystary bunyń aıǵaǵy bolyp tabylady», delingen habarlamada.

Ekijaqty baılanystardy kúsheıtýge baǵyttalǵan úlesin joǵary baǵalaǵany úshin K. Braýn Qazaqstan basshylyǵyna shynaıy alǵysyn bildirdi. Ol birqatar birlesken is-sharalardy sátti júzege asyrýyna jol ashqan qazaqstandyq dıplomattarǵa brıtandyq elshiligimen jemisti áreketteskeni úshin rızashylyǵyn aıtty.