Kezdesý barysynda Memleket basshysyna Qazaqstan Respýblıkasy Qarýly Kúshteriniń elimizdiń qorǵanys qabiletin nyǵaıtý men áskerimizdiń jaýyngerlik daıyndyǵyn arttyrý máseleleri boıynsha 2017 jyly atqarǵan jumystarynyń qorytyndysy jóninde baıandaldy dep habarlaıdy Qamshy.kz aqparat agenttigi. 

Nursultan Nazarbaev armıamyz qurylǵannan bergi 25 jyl ishinde aýmaqtyq tutastyǵymyzdyń, memleketimizdiń ekonomıkalyq turǵydan órkendeýi men bedeliniń nyǵaıa túsýiniń kepiline aınalǵanyn atap ótti.

– Biz bıyl memleketimizdiń áskerı qurylymynyń baǵyty men ony ári qaraı damytýdyń mindetteri belgilengen ulttyq qaýipsizdik strategıasyn, áskerı doktrınany, Qarýly Kúshterdi damytýdyń tujyrymdamasyn bekittik. Osy qujattardy iske asyrý nátıjesinde 2020 jylǵa qaraı Qarýly Kúshterimizdiń qýaty áskerimizdiń jaýyngerlik áleýetiniń artýy esebinen bir jarym ese ósýge tıis. Arnaýly operasıalar kúshiniń múmkindikteri úsh ese artatyn bolady, – dedi Qazaqstan Prezıdenti.

Sondaı-aq, Memleket basshysy Qazaqstan Respýblıkasy Qarýly Kúshteri kıberáskeriniń basqarý pýnktin aralap kórip, aqparattyq júıelerdiń kıberqorǵanysyn qamtamasyz etýdiń qazirgi múmkindikterimen tanysty.

Sońynda Nursultan Nazarbaev elimizdiń Qarýly Kúshterin odan ári damytý jóninde birqatar naqty tapsyrma berdi.