Tegeran polısıasy budan bylaı ıslam úlgisimen kıinbegen áıelderdi qamaýǵa almaıdy, onyń ornyna túsindirý ortalyǵyna jiberedi, dep Azattyqqa súıene otyryp jazady Qamshy.kz aqparat agenttigi. 

Tehran Times gazeti 28 jeltoqsanda polısıa generaly Hosseın Rahımıdiń sózine silteme berip, ıslam dress-kodyn kımegen áıelder jaýapqa tartylmaıtynyn habarlady.

Irannyń Tasnim aqparat agenttigi áıelder jaýapqa tartylýdyń ornyna arnaıy leksıaǵa jiberiletinin jazady. Erejeni ekinshi qaıtara buzǵan áıelderdiń ǵana jaýapqa tartylatyny aıtylǵan.

Rahımıdiń málimdeýinshe, Tegeranda dress-kodqa baılanysty 100-den astam keńes berý ortalyǵy jumys isteıdi. 1979 jylǵy revolúsıadan keıin Iranda kıim kıý úlgisinde konservatıvti ereje ornatylǵan. Bul erejege sáıkes, Iranda áıelder shashyn jaýyp, uzyn, bos kóılek kıip júrýi kerek.