Qańtarda ótetin Qaýipsizdik Keńesinde ıadrolyq qarýdy taratpaý máselesi basty talqylanatyn taqyryp bolmaq. Bul týraly seısenbide Nú-Iorktegi BUU shtab-páterinde bolǵan baspasóz máslıhatynda Qazaqstannyń BUU janyndaǵy turaqty ókili, Qaýipsizdik Keńesiniń qańtardaǵy tóraǵasy Qaırat Omarov málimdedi, dep jazady Qamshy.kz aqparat agenttigi.
Qazaqparattyń málimetine súıensek, elshi Qaýipsizdik Keńesiniń osy aıdaǵy jumysy jaıynda áńgimeledi, sondaı-aq 18 qańtarda Keńeste jappaı qyryp-joıý qarýlaryn taratpaýǵa arnalǵan joǵary deńgeıdegi taqyryptyq brıfıń ótetindigin aıtty. Oǵan birqatar elderdiń basshylary men mınıstrleri qatysady. Brıfıńte Qazaqstan Prezıdenti Nursultan Nazarbaev sóz sóıleıdi.
«Nelikten bul máseleni qozǵaýǵa sheshim qabyldadyq? Biz búgingi tańda túrli saıası kóshbasshylardyń, elderdiń arasynda senimdi qarym-qatynastar qurýǵa kóbirek mán berýimiz qajet dep esepteımiz», - dedi Qaırat Omarov. - Onsyz eshqandaı máseleni sheshý múmkin emes. Menińshe, qazirgi álemde dál osy jetpeı tur».
Q. Omarov 19 qańtar kúni Qaýipsizdik Keńesinde Qazaqstannyń syrtqy ister mınıstri Qaırat Ábdirahmanov Aýǵanstan men Ortalyq Azıa elderi arasyndaǵy óńirlik yntymaqtastyqty nyǵaıtýǵa arnalǵan mınıstrler deńgeıindegi pikirsaıysqa tóraǵalyq etetindigin málim etti. Otyrysta BUU Bas hatshysy Antonıý Gýterrısh sóz sóıleıdi. BUU basshysy Ortalyq Azıaǵa ótken jyldyń jazynda kelgen.
Qazaqstan elshisiniń sózine qaraǵanda, Qaýipsizdik Keńesiniń qańtardaǵy kún tártibinde turǵan úshinshi mańyzdy taqyryp Taıaý Shyǵys, sonyń ishinde Palestına máselesi bolmaq. Sondaı-aq Qaýipsizdik Keńesiniń músheleri Sırıadaǵy jaǵdaıdy da talqylaıdy, - dedi Q. Omarov. Ol 2017 jyly jeltoqsanda Astanada Sırıa boıynsha kezekti kezdesý ótkendigin eske saldy. BUU-da ony nátıjeli dep baǵalady.
Qazaqstan alǵash ret Qaýipsizdik Keńesiniń múshesi boldy jáne alǵash ret oǵan tóraǵalyq etýde. Qazaqstan Ortalyq Azıa elderiniń ishinde Qaýipsizdik keńesiniń turaqty emes músheligine saılanǵan alǵashqy memleket atandy.
