Qazaqstannyń BUU janyndaǵy Turaqty ókili Qaırat Omarov BUU Qaýipsizdik Keńesiniń tóraǵasy retinde tuńǵysh baspasóz máslıhatyn ótkizdi, dep jazady Qamshy.kz aqparat agenttigi.

Qazaqstan syrtqy ister mınıstrliginiń (SİM) habarlaýynsha, Astana bul mindetti qańtardyń 1-inen 31-ne deıin atqarady.

BUU Qaýipsizdik Keńesine múshe elderdiń turaqty ókilderi qańtar aıyndaǵy tóraǵalyq baǵdarlamasyn qańtardyń 2-i kúni qarastyryp, sol kúni Qaýipsizdik Keńesi jumysynyń baǵdarlamasy týraly baspasóz máslıhatyn ótkizdi.

Brıfıń barysynda elshi qantarda atqarylatyn tóraǵalyqtyń baǵdarlamasyn tanystyrdy. Negizgi úsh is-shara josparlanýda:

1) Elbasy Nursultan Nazarbaevtyń qatysýymen ótetin jappaı qyryp-joıatyn qarýdy taratpaý boıynsha otyrys. 

2) Qazaqstan Syrtqy ister mınıstri Qaırat Ábdirahmanovtyń tóraǵalyǵymen Ortalyq Azıa jáne Aýǵanstan boıynsha pikirsaıys. Kezdesýge OA jáne Aýǵanstannyń syrtqy ister mınıstrleri qatysady.

3) Taıaý Shyǵys boıynsha elshiler deńgeıindegi toqsandyq pikirtalastar.

Budan ózge Kolýmbıadaǵy beıbit prosesi, Sırıadaǵy jaǵdaı, Afrıkadaǵy jeti bitimgershilik operasıaǵa sholý jáne taǵy basqalary talqylanbaq.

50 mınýtqa sozylǵan baspasóz máslıhatynda BUU janyndaǵy tilshiler Iran, Soltústik Koreıa, Izraıl-Palestına janjaly, Pákistan, Iemen, Mánma, klımattyń ózgerýi jóninde saýaldardy qoıdy.

Qańtardyń 18-i kúni Qazaqstan prezıdenti Nursultan Nazarbaevtyń tóraǵalyǵymen BUU Qaýipsizdik Keńesi músheleriniń "Jappaı qyryp-joıý qarýyn taratpaý: senimdi nyǵaıtý sharalary" taqyrybynda joǵary deńgeıdegi taqyryptyq pikirtalastary ótedi. Sapar barysynda, buǵan deıin habarlanǵandaı, Nazarbaev AQSH prezıdenti Donald Tramppen kezdesedi dep josparlanǵan.

Astana BUU Qaýipsizdik Keńesiniń tóraǵasy qyzmetindegi basymdyqtary retinde ıadrolyq qarýsyz álemdi jaqyndatý; jahandyq soǵys qaterin boldyrmaý jáne jergilikti janjaldardy retteý; aımaqtyq qaýipsizdik pen yntymaqtastyqty nyǵaıtýda Ortalyq Azıanyń múddelerin ilgeriletý; terorızmge qarsy kúres jáne ózge maqsattardy atap otyr.

Qazaqstan bıligi táýelsizdigin jarıalaǵaly beri ótken 26 jyldyń ishinde eldiń úlken jetistikterge qol jetkizgeni jáne álemge tanymal bolǵany týraly aıtady. Halyqaralyq quqyq qorǵaýshy uıymdar resmı Astanany elde ózge pikirdegilerdi qýdalap, negizgi quqyqtar men bostandyqtardy shekteıtini jáne túrmede saıası tutqyndardy ustap otyrǵany úshin synap keledi.