Búgin Astana ákimi Ádilbek Jaqsybekov daryndy balalarmen - elorda mektepteriniń oqýshylary, respýblıkalyq jáne halyqaralyq olımpıada, túrli konkýrstar men ǵylymı jobalardyń jeńimpazdarymen kezdesti.

Kezdesý beıresmı jaǵdaıda ótti. Sharanyń tizginin de oqýshylar óz qoldaryna aldy. Jas fızıkter, matematıkter, ınformatıkter, arhıtektorlar, sýretshiler, ekolologtar men sportshylar elorda basshysyna ózderiniń tabystary men jetistikteri jaıynda áńgimelep, bolashaq josparlarymen bólisti.

Ákim qyzyqqa toly kezdesý úshin balalarǵa alǵysyn bildirip, kóptegen suraqtaryna jaýap berdi. Jáne sportpen, dene shynyqtyrýmen shuǵyldaný olardyń densaýlyǵy men qalypty damýyna áseri mol ekenin esterine saldy. Qala ákimi jas kóshbasshylardy qol jetkizgen nátıjemen shektelmeı, odan ári alǵa basýǵa shaqyrdy.

"Bizdiń jastardyń arasynda Bıll Geıts sıaqty ınnovatorlar, Abaı Qunanbaıuly sıaqty fılosoftar, Qanysh Sátbaev sıaqty ǵalymdar, Muhtar Áýezov sıaqty jazýshylar júrýi múmkin. Senderdiń oqyp, bilim alýlaryń úshin, jetilip, damý úshin barlyq múmkindikter jasalyp jatyr. Senderdiń bolashaqtaryńnyń jarqyn bolýy - bul qalamyzdyń, tutas elimizdiń bolashaǵynyń jarqyn bolýy degen sóz", - dedi ol.

Sóz sońynda Ádilbek Jaqsybekov "Senderge tek sáttilik pen jeńister tileımin!" - dep jas jetkinshekterge óz tilegin bildirse, daryndy oqýshylardyń biri qala basshysymen selfı jasap úlgerdi. "QazInform"