18 qańtar kúni «Turkvision-2014» án baıqaýynyń jeńimpazy, ánshi, aktrısa Janar Duǵalovanyń týǵan kúni. Talantty ánshi osy kúni 28 jasqa toldy.
Janar Duǵalova 1987 jyly 18 qańtarda Qyzylorda qalasynda dúnıege kelgen. Pavlodar qalasynda ósken. Dıapazony keń ánshi. Birinshi muǵalimi — anasy. Sol úshin Janar jastaıynan ánshi bolýdy armandaǵan. Alty jasynda birinshi ret jetistikke jetti. Ary qaraı respýblıkalyq, qalalyq baıqaýlardan jeńiske jetken. 2001 jyly «Jas qanat» baıqaýynyń júldegeri atandy. Mýzykalyq kolejdijáne GITIS-ti Moskvada bitirgen. Óner jolyn alǵash prodúser Baıan Esentaevamen kezdeskennen keıin bastady. Ánshi bolýdan basqa akterlik sheberligi de jeterlik. «Ǵashyq júrek-2″, «Mahabbatym júregimde» fılmderinde oınaǵan.
Jan-jaqty talant ıesin búgingi týǵan kúnimen quttyqtaımyz. Ánshige zor densaýlyq, bol baqyt, shyǵarmashylyq tabystar tileımiz!
Osy oraıda Janar Duǵalovanyń suhbattarynda aıtqan qyzyqty da mańyzdy áńgimelerin nazarlaryńyzǵa usynamyz.
Janar Duǵalova ónerdi erekshe baǵalaıtyn jan. Kishkentaı kúninen án aıtyp óskendikten, óziniń sahnasyn, ónerin únemi birinshi orynǵa qoıady. Osy oraıda bir suhbatynda «Meniń oıymsha, eń birinshi «tanymal bolamyn» dep emes, ónerimdi tanytamyn degen maqsat qoıý kerek. Keıbiri darynymen, endi biri tek tartymdylyǵymen áıgili bolady. Eń bastysy, sahnaǵa degen mahabbat bolýy kerek dep oılaımyn. Al qyzdarǵa aıtarym, eger boıynda daryny bolsa, Alla jolyn ashady. Jetistikterge tek adal eńbekpen jetýge bolatyndyǵyna senim kerek. Men úshin tanymal bolý maqsat emes. Ári ol ónerińniń jalǵyz kórsetkishi emes dep oılaımyn»
Sondaı-aq, ánshi mahabbattyń qudiretine senedi. Onyń oıynsha mahabbatsyz ómir súrýdiń esh maǵynasy joq. Janar Duǵalova suhbatynda «Mahabbatsyz ómir de, óner de joq. Qandaı mahabbat bolsa da, burynǵy, qazirgi ol eshqaıda ketpeıdi. Únemi adamǵa shabyt beredi. Óner adamy ǵashyq bolmaı tura almaıdy dep oılaımyn. Sezimsiz shabyt bolmaıdy. Sebebi, ishiń bos bolyp tursa, keremet án jazý múmkin emes. Tipti, ándi de ádemi jetkize almaısyń. «Mahabbatsyz dúnıe bos» demekshi, árqashan ǵashyqtyq sezimin bastan keshiremin. Árqashan ǵashyqpyn deýge bolady. Unatyp júrgen adamym bar. Al qazir men úshin ónerim mańyzdy. Allaǵa senetin, rýhanı baı, aqyldy, sabyrly jigitter unaıdy. Al kórki ózim úshin tartymdy bolsa jetkilikti. Ózgelerdiń pikiri men úshin mańyzdy emes. Sondyqtan, júrek únime ǵana qulaq asamyn. Ǵashyq bolý keremet nárse. Ónerimdi túsinetin, baǵalaıtyn jigitke qana turmysqa shyǵamyn. Óıtkeni, men úshin otbasylyq ómir de, ónerim de mańyzdy. Men ana bolý baqytyn sezingim keledi jáne osyny erekshe kútemin. Óte balajan adammyn. Men úshin ana bolý úlken baqyt. Kem degende úsh balanyń anasy bolýdy armandaımyn. Eger múmkindigim bolyp jatsa, jetim balalalardy da asyrap alýǵa qarsy emespin. Qaıyrymdylyq sharalaryna jıi qatysyp turýǵa tyrysamyn. Ata-anasyz, qaraýsyz qalǵan sábılerge júregim qatty aýyrady. Barlyq sábı baqytty bolýǵa laıyq»
Ánshi únemi ata-anasyna qarap boı túzeıdi eken. Ómirinde ata-anasynyń baryna, sondaı keremet jandardy jaratqan Allaǵa árdaıym rızashylyǵyn bildiredi. Osy oraıda suhbatynda «Keremet adamdardyń qyzymyn. Osy eki adamnyń mahabbatynan dúnıege kelgenime rızamyn. Keıde Allama osyndaı keremet adamdar bergenine qýanamyn, jylaımyn. Únemi sol kisilerge qarap boı túzeımin. Ánshilik qasıetim anamnan daryǵan. Ákemniń esimi Asylbek. Energetıka salasynda qyzmet atqarǵan adam. Al anamnyń aty Raıa. Ánshilik qasıetim anamnan daryǵan. Qazir Pavlodar qalasynda hor dırıjeri retinde jas ánshilerge ustaz bolyp júr. Anam ózi jetpegen belesterdi meniń baǵyndyrǵanymdy qalaıdy. Osy úmitin aqtaýǵa tyrysyp júrmin. Artymnan ergen Aıjan esimdi sińlim bar»
Janar adal dostyqqa senedi. Óziniń janyna jaqyn úsh qurbysy bar. «Árıne adal dostyqqa senemin! Eń birinshi dostyqqa adal bolý adamnyń nıetine baılanysty der edim. Eger dosyńa degen kóńiliń aq, qýanyshy men qaıǵysyna ortaq bola bilseń, ishińdegi syryńmen erkin bólise alsań, mine, bul naǵyz dostyq. Meniń de jaqyn aralasatyn úsh qurbym bar. Osyndaı dostarymdy maqtan tutamyn. Olar úshin árdaıym kómekke daıynmyn, olar da qajet kezde qasymnan únemi tabylady»
Talantty ánshiniń oıynsha adam mańdaıyna jazylǵan nárseni kóredi. Sondaı-aq, ózindik ómirlik ustany bar. «Adam mańdaıyna jazylǵan nárseni kóredi. Óz basym taǵdyrǵa senemin. Ómirlik ustanymym — adal, durys jolmen júrý. Eshkimge jamandyq jasamaý. Men taǵdyrǵa óte qatty senemin. Adam bolyp ómirge kelgennen keıin, adam bolyp qalý»-,dep jaýap berdi suhbattarynda.
camode.kz saıtyna bergen jáne YouTube-taǵy suhbattarynan alyndy
"Baıstars"
