Halqynyń senimin aqtaýdy arqalap, úmitin moınyna júktep, eldiń múddesi úshin janyn pıda etýge senimmen saılanǵan belsendi halyq qalaýlysy ári qamqorshysy depýtat Sizder ekeni aıan.
Qurmetti depýtat myrzalar, Sizderge jańa jyldyń jalyndy sálemin joldap, eńbekterińizden tabys kútip, álemniń tynysh bolýyn tilep, elimiz aman, zamanymyz jaıly, ósip-órkendep, jetistikterge jete berýine senimdilik bildire otyryp, tómendegi eki másele oryndala ma degen asyl armanymdy joldaýdamyn:
- Memleket óz halqynyń deni saý, tirshilik etý deńgeıin jaqsartyp, jyrǵaýly, beıbit ómir súrgizýge mindetti. Al, bizde aılyq jalaqynyń tómengi jáne joǵary deńgeıi jer men kókteı aıyrmashylyqta bolǵandyqtan, baı-kedeı tabyn ádeıi týǵyzǵandaımyz.
Dúkendegi taýar men komýnaldyq shyǵyn quny bárine ortaq. Urpaqtyń tileýi de, tilegi de birdeı. Baıshykeshtiń balasy ne kıip, ne jese, kedeıdiń de balasy sony alyp ber dep tileıdi. Sondyqtan, qatań baǵa toqtatyp, aılyq jalaqyny 100 myń teńge mólsherinde bolǵyzý abzal. Depýtat myrzalar, ózderińiz úlgi kórsetip, sol únemdelgen qarjyǵa burynǵy qysqartylǵan aýyl, aýdan, oblystardyń mártebesin qaıta berý – búgingi ómir talaby. Mysaly, bir máselemen Almatydan Taldyqorǵanǵa barasyń. Ol kúni jumys bitpese, qonýǵa týra keledi. Jol qarjysy, tamaq, ýaqyt, qonaq úıdiń qarajaty qaltaǵa zábiri bolary haq.
- Depýtattar men ákim, atqaminerlerdiń daıashylyǵyna tikushaq qoldaný týraly jańa bastama kóterilýde. Bul órkenimizge táýba, qýanarlyq jaı. Menińshe, tik ushaqty aýdan, oblystardyń ákimshiligi men aýrýhana mekemesine kerektense ıgi. Naýqasty aýdan, oblys aýrýhanasyna shuǵyl jetkizýge, sondaı-aq órt, qaýip, ártúrli apat kezinde qoldanylsa tıimdi bolar edi. Dál osy kezde aýyldardy jol, aýyz sý, gazben qamtamasyz etý aýadaı qajet.
Densaýlyq pen bilim berý júıesin tegin boldyrý sharalaryn uıymdastyryp, qolǵa alyp, júzege asyrylsa, halyq qamy úshin zeınetke shyqqanda jáne qaıtys bolǵanda árbir janǵa 3-12 aı zeınetaqy aılyq jalaqysyn bir rettik kómek retinde berse ıgi is bolar edi.
Qoǵam adam úshin, adam qoǵam úshin degen pıǵyl toǵysqanda ǵana órken órge júzip, halyqtyń tirshilik etý deńgeıi joǵarylap, máńgilik el bolarymyz aıan, aǵaıyn!
Úrimhanuly Ókeı
