Óner adamdarynyń arasynda isti bolyp, sottalyp, sottasyp jatqandar bar dep jazady Today.kz. Máselen, búgin Muhtar Áýezov atyndaǵy akademıalyq qazaq drama teatrynyń dırektory Erlan Bilál para almaq bolǵan jerinen ustaldy degen aqpar tarady.
"Muhtar Áýezov atyndaǵy Qazaq memlekettik akademıalyq drama teatrynyń dırektory Almatyda Jańa jyl kezinde balalarǵa qoıylym qoıý maqsatynda teatrdan oryn berý úshin zańdy tulǵadan 1,5 mıllıon teńge para aldy degen kúdikke ilindi. Kinásin tolyq moıyndaýyna baılanysty ol qamaýǵa alynǵan joq. Sotqa deıingi tergeý sharalary júrip jatyr", - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın.
Sotty bolǵan óner adamdarynyń kóshin bastap turǵan, el arasynda qyzý talqyǵa túsken Jamanqulov isi boldy. 2017 jyly akter Tuńǵyshbaı Jamanqulov jetekshilik etken toptyń "Fenıks" fılmine bólingen búdjet qarajatyn ıemdengeni belgili bolǵan edi.
Sýdıa Táken Shakırov "Tuńǵyshbaı Jamanqulov 7 jylǵa bas bostandyǵynan aıyrylsyn, 5 jyl memlekettik qyzmette isteýge tyıym salynady. Raqymshylyqqa baılanysty, jaza 3 jyl 6 aıǵa qysqaryp, shartty túrge aýystyrylsyn", - degen úkim shyǵarǵan bolatyn.
2016 jyly qazaqstandyq serıaldardyń akteri Nurjan Toılybaev adam óltirý isi boıynsha 11 jylǵa bas bostandyǵynan aıyryldy. 38 jastaǵy akter buryndary zorlaý isi boıynsha jáne buzaqylyq jasaǵany úshin sottalǵan. Nurjan Toılybaev "Máńgi el", "Záýre" jobalaryna qatysqan, sonymen qatar "Aıman-SHolpan" jáne "Ógeı júrek" serıaldaryna túsken.
Osydan birshama jyl buryn talantty ánshi Qaırat Túntekov te isti boldy. Mas kúıinde rólge otyryp, jol apatyn jasaǵany úshin Qaırat Túntekov abaqtyǵa 40 kúnge qamaldy. Materıaldyq shyǵyndy 7 mıllıonǵa baǵalaǵan jábirlenýshi tarap somanyń birden tólenýin talap etken bolatyn.
İsti bolǵan ánshilerdiń biri - balqashtyq ánshi Stanıslav Kım. Ol 2016 jyly 14 jastaǵy qyzdy óltirdi degen aıyppen 14 jylǵa sottaldy.
Aıta keteıik, ánshi Qaırat Nurtastyń anasy, prodúser Gúlzıra Aıdarbekova da sot aldynda jaýap bergen. 2014 jyly jazda jol apatyn týdyrǵan prodúser kináli dep tanylǵan. Sot Aıdarbekovany Qazaqstan Respýblıkasynyń Ákimshilik quqyqbuzýshylyq týraly Kodeksiniń 468-1 baby, 468-babynyń 1-bóligimen kináli dep taýyp, oǵan osy baptar boıynsha 210 aılyq eseptik kórsetkish mólsherinde aıyppul taǵaıyndaǵan.
Qazaqstandyq sánger Quralaı Nurqadilova da sot aldynda talaı barǵan. Ol birneshe bankpen sottasyp, jeńilis te tapqan edi. Nurqadilova 2006 jyly bankten nesıe alǵanyn, al banktiń 44 myń dollardy zańsyz qosyp qoıǵanyn habarlaǵan. Alaıda sot bankter tarapyna oń sheshim shyǵaryp, Zamanbek Nurqadilovtyń qyzy Quralaıdyń úıin tárkiledi.
Óner adamdarynyń arasynda ózara sottasqandary da bar. Máselen, belgili dızaıner Jado ánshi men Merýert Túsipbaevanyń daýy sotqa jetip, qoǵamdyq qyzý pikirtalas týdyrǵan edi. Bul máselede Merýert Túsipbaeva Jadonyń kásibı bilimi baryna kúmándanyp, áleýmettik jeli arqyly ony synǵa alǵan edi.
"Biz árbir aıtqan sózimizge jaýap berýimiz kerek. Jado men Merýert Túsipbaeva arasynda sot otyrysy bolady. Merýert Túsipbaeva Jadony oqymaǵan dep synaǵan edi, biz sotta onyń bilimi baryn dáleldeımiz" degen dızaınerdiń prodúserlik ortalyǵy sotqa deıin barǵan bolatyn.
Aqbota Musabekqyzy
