Mı-julyn, júıke júıesiniń aýrýlaryn emdeıtin Eýropadaǵy qazaq dárigeri búgingi kúnge deıin 4 myńnan astam kúrdeli operasıa jasap úlgergen. Bul týraly Qamshy.kz aqparat agenttigi 24.kz-ke silteme berip habarlaıdy. Medısına ǵylymdarynyń doktory Jádik Shenoldyń esimi Germanıada keń taralǵan. Álıa, Náıla, Rana jáne Muhammad úshin Jádik Shenol qarapaıym áke bolsa, Germanıa qoǵamy úshin bul esimniń ataǵy zor. Jeti tildi jetik biletin Kıl ýnıversıteti aýrýhanasynyń neırohırýrgi Jádik Shenol – Qazaqstanda kóp bolmasa da, ana tilin umytpaı, ulyqtap júrgen azamattardyń biri. Til ǵana emes, bilikti qazaq azamaty – adamnyń eń kúrdeli ári qudiretti aǵzasy – mı jáne mıdyń san túrli tamyryna ota jasaıtyn Eýropadaǵy bilikti biregeı maman. Ol Azıa, Amerıka elderine de jıi baryp, osy saladaǵy tanymyn tereńdetý jolynda tynymsyz ter tógip keledi.
– Neırohırýrgıadan bastalǵan tájirıbeme 20 jylǵa jýyq ýaqyt boldy. Men barlyǵyn tizbektep otyramyn. Qazirge deıin 4 myńnan astam aýrýǵa neırohırýrgıalyq ota jasadym. Onyń ishinde mıdyń isikteri, mıdyń tamyryndaǵy aýrýlar, mıǵa qan quıylǵan jaǵdaılarda jasaımyn. Sonymen qatar gıdrosefalıada, ıaǵnı julyndaǵy aýrýlarda da operasıa jasaǵan kezderim kóp-,deıdi ol.
Jat elde dúnıege kelgenine qaramastan, dárigerdiń tórt balasy da qazaq tilin jetik biledi eken. Tili nemisshe taza, alaıda túri men qoıý qara shashyna qarap, álemniń ár túkpirindegi naýqastar «ultyńyz kim?», – dep suraıdy eken keıde. Mundaı sátte dáriger «qazaqpyn», – dep maqtanyshpen jaýap beretinin aıtady.
