Astana-SHardja baǵytynda ushyp ketýi tıis bolǵan Air Arabia áýe kompanıasynyń reısi taǵy keıinge qaldy dep habarlaıdy Qamshy.kz aqparat agenttigi tengrinews.kz saıtyna silteme jasaı otyryp. Bul jóninde "Nursultan Nazarbaev" áýejaıynyń baspasóz qyzmetindegiler habarlady. 89 jolaýshysy bar ushaq Astanadan 6 qańtar kúni saǵat 4.55-te ushyp shyǵýy tıis bolǵan. Alaıda esigi qatyp qalyp, reıs keshki saǵat 19.00-ge aýystyrylǵan bolatyn. Alaıda kórsetilgen ýaqytta ushaq taǵy ushyp shyqpady.

"Jolaýshylar qaýipsiz jerde, 1 nomerli termınalda. Air Arabia bul áýe kemesine qyzmet kórsetý boıynsha Air Astana áýe kompanıasynyń qyzmetin paıdalanady. Qazirgi tańda "Eır Astana" kompanıasynyń ınjenerleri  ushaqtyń ushpaı qalý sebepterin anyqtap jatyr. Astana áýejaıynyń bul jaıtqa jáne Air Arabia bortynyń tehnıkalyq jaǵdaıyna esh qatysy joq. Astana áýejaıynyń qyzmetkerleri jolaýshylardy tynyshtandyryp, áýejaı ǵımaratynda olarǵa qolaıly bolý úshin jaǵdaı jasap, bar kúshterin salyp jatyr", - dedi baspasóz qyzmetindegiler.

Keıin áýejaı mamandary Astana - Shardja reısiniń belgisiz ýaqytqa qaldyrylǵanyn habarlap, adamdardyń úıge jiberilgenin aıtty.

6 qańtar kúni keshke Facebook qoldanýshysy Denıs Krıvosheev áleýmettik jelidegi paraqshasyna Air Arabia ushaǵynyń qozǵaltqyshy "qatty tútindep, ot almady" dep jazdy. Ol oqıǵa ornynan birneshe sýret pen vıdeony jarıalady, sonymen qatar, "252 reısiniń jolaýshylary ushýdan túbegeıli bas tartty" dep málimdedi.

Alaıda, Astana áýejaıy baspasóz qyzmetiniń mamandary áýe kompanıasyna jolaýshylardyń ushýdan bas tartqandary jóninde eshkimniń habarlamaǵanyn aıtty.