Ótken jyly Qazaqstannyń kitap qory eki súbeli eńbekpen tolyqty. «Orhon» baspa úıiniń muryndyq bolýymen Vetnam memleketiniń uly qaıratkeri Ho Shı Mınniń ómirbaıandyq týyndysy men pákistandyq zertteýshi ǵalym Ishtıaq Qusaıyn Qureshıdiń «Pákistan úshin kúres» kitaby qazaq tiline aýdaryldy. Bul eki kitapty jaryq kórýine Vetnam Sosıalısik Respýblıkasy men Pákistan Islam Respýblıkasynyń Qazaqstandaǵy elshilikteri jan-jaqty qoldaý kórsetti dep habarlaıdy Qamshy.kz aqparat agenttigi. 

Bul týyndylardyń basty ereksheligi – atalǵan eńbekter qazaq tiline aǵylshyn tilinen tikeleı tárjimalanǵan. Sheteldik jádigerlerdiń qazaqshaǵa aýdarǵan belgili shyǵystanýshy, til mamany – Almas Másálim. Onyń aıtýynsha ár kitapty aýdarýǵa shamamen toǵyz aıdaı ýaqyt jumsalǵan. «Oqyrmanǵa jeńil bolý úshin, barynsha jatyńqy etip aýdardyq. Ho Shı Mın týraly kitapta qazaqsha mátin men aǵylshynsha mátin qatar berilgen. Ekeýin salystyryp oqýǵa múmkindik bar. Sondaı-aq Vetnam ult-azattyq qozǵalysy kóshbasshysynyń ár jyldary túsken fotolary da qosa berildi. Al, «Pákistan úshin kúres» kitabynda 19-20 ǵasyrlardaǵy Ońtústik Azıa sýbkontınentinde oryn alǵan saıası oqıǵalar, onyń ishinde musylman qaýymynyń jeke táýelsiz Pákistan memleketin qurý jolyndaǵy kúresi baıandalady» deıdi A.Másálim.

«Orhon» baspa úıi osy baǵyttaǵy jumystardy ary qaraı jalǵastyryp, aldaǵy jyly taǵy da birqatar halyqaralyq eńbekterdi qazaq tiline aýdarýdy josparlap otyr.