«Turkvision-2014» án baıqaýynda Janar Duǵalovamen birge óner kórsetken kúıshi Nurjan Tájikenovtiń esimi halyqqa baıqaýdan soń keńinen tanyla bastady. Baıqaýǵa deıin kúıshi birneshe iri sharalarda, shet elderde de qazaqtyń qara dombyrasymen óner kórsetken. Sonymen qatar, otandyq mýzykalyq telearnalardan beınebaıandaryn da shyǵaryp úlgergen. Alaıda siz jas talantty kúıshi jaıly ne bilesiz? Nurjan Tájikenov kim? Biz osy oraıda qasıetti dombyrada erekshe oınaıtyn daryn ıesimen oqyrmandarymyzdy jaqynyraq tanystyrýdy jón sanadyq.
Nazarlaryńyzǵa Nurjan Tájikenov jaıly 10 derek usynamyz.
- 1989 jyly 16 qyrkúıekte, jylan jyly dúnıege kelgen.
- Batys Qazaqstan óńiri, Atyraý oblysy, Qulsary qalasy, Jylyoı aýdanynda dúnıege kelgen. Balalyq shaǵyn tolyqtaı osy óńirde ótkizgen.
- Batys Qazaqstan óńirinde mektepti bitirgen. 4-synyptan 9-synypqa deıin besjyldyq №2 mýzykalyq mektepte bilim alyp, kúı ónerine degen qyzyǵýshylyǵy sol sátten bastalǵan. 9-synypty aıaqtaǵannan keıin Atyraý oblysyndaǵy D. Nurpeıisova atyndaǵy halyqtyq mýzykalyq akademıasy Atyraý mýzyka kolejinde bilimin jalǵastyrǵan. Kolejdi aıaqtaǵannan keıin Almaty qalasyndaǵy Qurmanǵazy atyndaǵy Qazaq Ulttyq Konservatorıasynda oqyǵan.
- Qarapaıym otbasynan shyqqan. Ápkesi jáne qaryndasy bar. Úıindegi jalǵyz ul. Ákesi munaı salasynda jumys jasaıdy. Al anasy — muǵalim.
- Kúlásh Nımatova, Klara Joldasova, Karıma Saharbaeva syndy profesorlardan bilim alǵan. Sonymen qatar, Qazaqstan Respýblıkasynyń halyq ártisi, memlekettik syılyqtyń laýreaty, «Parasat» ordeniniń ıegeri Qarshyǵa Ahmedıarovtyń kózin kórgen eń sońǵy shákirti.
- Eń alǵash beınebaıany «Saǵynysh» atty kúıge túsirilgen. Osy ýaqytqa deıin túrli kúıshilerdiń 400-ge jýyq kúıin oryndaǵan.
- Kúıshi retinde Qurmanǵazy, Dına sıaqty uly kúıshilerdiń ónerinen úlgi alady. Al qazirgi estradada «Ulytaý» toby men Asylbek Eńsepovty erekshe qurmetteıdi, ónerlerin baǵalaıdy
- Nurjan Tájikenovty alǵash Baǵym Mýhıtdenova konservatorıada birde óner kórsetip jatqanda baıqaǵan. Keıinnen «Qazaq arýy» sulýlyq baıqaýynda qatysýshy qyzdarynyń birimen óner kóretýge shaqyrǵan. Al osy jyly Baıan Maqsatqyzy ózi habarlasyp, «Turkvision» baıqaýyna Janar Duǵalovamen birge óner kósetýge usynys bildirgen.
- Dombyradan bólek fortepıanoda jaqsy oınaıdy. Sonymen qatar, úrmeli-soqpaly aspaptarda da oınaýdy jetik meńgergen. Biraq janyna qazaqtyń qasıetti qara dombyrasy jaqyn.
-
Eshqashan prodúsermen jumys jasap kórmegen. Alaıda endi Baıan Maqsatqyzy resmı túrde prodúseri boldy. Baıan Maqsatqyzy eń alǵash baıqaýda júrgende Qazan qalasynda usynys bildirgen. Elge kelgennen keıin Nurjan oılanyp, kelisimin bergen. Endi Baıan Maqsatqyzynyń jobalarynyń biri.
