Almaty polısıasy 1 aılyq sábıin 180 myń teńgege satpaq bolǵan áıeldi ustady. Bul týraly Qazaqstan jańalyqtary agenttigi qalalyq İİD baspasóz qyzmetine silteme jasap habarlaıdy.
Almaty oblysy, İle aýdanynyń 27 jasar turǵyny 19 jeltoqsanda Almaty perzenthanalarynyń birinde bosanǵan.
"Atalǵan azamatsha náresteni saýdalaýdy burynnan oılastyryp júrgen eken. Aıaǵy aýyr kezden óziniń balasyn satyp alatyn adamdardy izdegen. Ana baqytyn ańsap júrgen jalǵyzbasty áıel birden tabyldy. 1 aılyq qyz bala 180 myń teńgege baǵalandy. Eki mámileger keshki 7 shamasynda Bostandyq aýdanynda kezdesip saýdalasyp jatqan jerinen ustaldy", - dedi qalalyq İİD uıymdasqan qylmyspen kúres basqarmasynyń basshysy Tańat Nazanov.
Polısıa qyzmetkerleri tintý kezinde bosanǵan áıelden 180 myń teńgeni tárkiledi. Kelinshek óziniń jymysqy jospary baryn birden moıyndady.
Suraq-jaýap alý barysynda ol osyǵan deıin de eki bala týyp, perzenthanalarǵa qaldyryp ketkenin aıtqan.
Qazir oǵan qatysty Qylmystyq kodekstiń 135 babyna sáıkes (kámeletke tolmaǵan balalardy satý, saýdalaý) qylmystyq is qozǵaldy. "Nur.kz"
