Osydan 1 jyl buryn memleketimizdiń ıdeologıalyq saıasatyna jaýapty salada kadrlyq ózgerister bolyp, ishki saıasatqa jaýapty Baǵlan Maılybaev qyzmetten alastatylyp, keıinnen memleketke opasyzdyq jasady degen aıyppen 5 jylǵa sottaldy. Al onyń ornyna, sońǵy 3 jyl Reseıde elshi bolǵan, tájirıbeli, kásibı áleýmettanýshy Marat Tájın taǵaıyndaldy.

Baǵalan Maılybaev Prezıdent Ákimshligi basshysynyń birinshi orynbasary qyzmetin 5 jyl atqardy. Osy ýaqyt ishinde aqparattyq ıdeologıalyq keńistik destrýktıvty kúshterdiń qolyna ótip, saıası retteý tetikteri isten shyǵyp, Qazaqstannyń ishki saıası prosesi búlikke búline jazdady. Azamattyq qoǵam men opozısıalyq kúshterdin arasy ajyratylmaı, bılik pen qazaq qoǵamy arasynda antagonızm oryn aldy. Ideologıaǵa fýndamentalıst radıkaldar aralasty. Sonyń saldarynan Prezıdent Nazarbaevtyń basty jetistikteriniń biri — qoǵamdyq turaqtylyqqa qaýip tóndi. Beınelep aıtsaq «máńgilik elde» ıdeologıalyq daǵdarys bastaldy.

Tájın bir jyl ishinde maılybaevtardyń bylyǵynan qutylýmen qatar ıdeologıalyq júıe qurýmen aınalysty. Aqparattyq keńistik jat ıdeologıalyq nasıhattan azat etilip, rıtorıka ózgerdi. Aqparattyq qaýipsizdikke negiz paıda boldy. Aqparattyq keńistik jańa satyǵa shyǵyp, turaqtylyqtyń negizi bolyp sanalatyn bılik pen qoǵam arasyndaǵy dıalog bastaldy, onyń aıqyn kórsetkishi Ulttyq arna — ''Qazaqstan''-da tikeleı efırde saıası tok-shoý júrip, saıası opozısıanyń reprezentatıvty ókilderiniń túrli taqyryptarǵa baılanysty pikirlerin bildiretin boldy. Opozısıanyń bedeldi de prnısıpshil ókilderi Prezıdent Nazarbaev kórsetken Memleketti damytý vektorynyń ıdeologıalyq reformasyn ashyq qoldady. Radıkaldarmen radıkaldy jumys júre bastady, destrýktıvti kúshterdin yqpal etý keńistigine jol jabyldy.

Marat Tájınniń oralýymen memlekettiń basty ıdeologıalyq shtaby - Prezıdent Ákimshiliginen bastap jergilikti ákimdikterge deıingi memlekettiń búkil ıdeologıalyq aktıvy sapasy jańa dengeıge shyqty. Prezıdent Ákimshiligi memlekettik saıası sheshim qabyldaý ortalyǵyna ǵana emes, sonymen qatar, jańa kún tártibin anyqtap, iske asyrýyn qadaǵalaýshy, úılestirýshi ortalyqqa aınaldy. Marat Tájın Prezıdent Nazarbaev qurǵan memlekettik saıası júıeniń jańa jaǵdaıdaǵy ıdeologıasyn qurdy.

Tájınniń saıası fılosofıasynyń konsepsıasy nátıjeli ekenin sarapshylar moıyndady. Naǵyz nátıjeli ıdeologıanyń maqsaty - ultty jumyldyryp oǵan baǵyt kórsetý bolyp tabylady. Osy turǵydan, Tájınniń ıdeologıasy tek memlekettik ınstıtýttardy kúsheıtip qoıǵan joq, ol memlekettilikti kúsheıte aldy. Bul Tájınniń 1 ǵana jyl ishinde jasaǵan eńbegi.