Shetelde júrip óz kásibin órkendetip otyrǵan qazaqstandyqtar az emes. Qamshy.kz aqparat agenttiginiń tilshisi solardyń bir parasyn nazarlaryńyzǵa usynbaq.

Gaýhar Assıon

Gaýhar Assıon Fransıada jekemenshik «Chez Mademoiselle» meıramhanasyn ashqan. Meıramhananyń naryqta óz ornyn oıyp alǵanyna segiz jyldan astam ýaqyt bolǵan. Basynda fransýz taǵamdaryn usynǵan Gaýhar qazir eýropalyqtarǵa qazaqtyń ulttyq as mázirin tanytyp otyr. «Chez Mademoiselle» meıramhanasy – Fransıadaǵy eń iri meıramhananyń biri.

Osydan 17 jyl buryn qonys aýdarǵan Gaýhar elimizde zańger mamandyǵy boıynsha bilim alǵan eken.

Nazım Paltashev

Nazım Paltashev – AQSH-taǵy «Soul of Nomad» sán úıiniń basshysy. Nazım 2016 jyldan beri sándi kıim tigý naryǵynda júr. «Soul of Nomad» sán úıi Forbes jýrnalynyń úzdik reıtıńine kirgen.

Nazım Almaty qalasynda dúnıge kelgen. Eń qyzyǵy, ónerkásiptik ınjener mamandyǵyn bitirgen. Osy mamandyǵy óziniń brendin qalyptastyrýǵa kómektesipti. Nazım 2012 jyly Almatydaǵy páterin satyp, Amerıkaǵa kóship ketken. Sodan keıin óziniń sán úıin ashýǵa bel býǵan.

Saıda Taýkeleva

Saıda Taýkeleva – Grýzıadaǵy «MMA Georgia» men Armenıadaǵy «MMA Armenia» saqtandyrý kompanıasynyń basshysy. Kompanıanyń naryqqa shyqqanyna alty  jyldan asypty. Saıda Qazaq memlekettik  ýnıversıtetiniń kásipkerlik quqyq fakúltetinde alǵan mamandyǵyn oqyǵan.

Natalá Zaharova

Natalá Zaharova Qaraǵandy qalasynda týǵan. Sol qaladaǵy aǵylshyn tiline beıimdelgen №3 mektepti bitirgen. Italıada joǵary bilim alǵan.

Natalá – Italıadaǵy bıznesi qabyldaý týroperatory. Naqtyraq aıtsaq, ol Italıaǵa kelgenderge ekskýrsıa jasatyp, qonaq úı taýyp beredi. Natalányń týrısik kompanıasy 2013 jyldan beri naryqta kele jatyr.

Saltanat Muhtarova

Saltanat Muhtarova – «Grýzıadaǵy demalys» týrızm agenttiginiń negizin salýshy. Tórt jyldan beri osy salada eńbek etip keledi.

Saltanat Lomonosov atyndaǵy Máskeý memlkettik ýnıversıtetiniń geografıa fakúltetinde oqyǵan. Bala kúninde saıahattaýdy armandaǵan Saltanat búginde sol armanyna qol jetkizdi.

Serikbaı Bısekeev

«Arman» holdıńiniń prezıdenti. Serikbaı Bısekeev – Reseıdegi eń beldi bıznesmenniń biri. Ol – tek Reseıde ǵana emes, búkil álemde básekege qabiletti joǵary tehnologıalyq ónim shyǵaratyn iri korporasıa qurǵan azamat. Serikbaı Qostanaı oblysyndaǵy Qamysty aýylynda dúnıege kelgen.

Serikbaı Bısekeev «Jyl kásipkeri – 2012» halyqaralyq baıqaýynda  reseıdegi fınalısteri qataryna kirip, «V2V» nomınasıasynda marapatqa ıe boldy.