Men ádebıetke kelip jatqan jastardy aıaımyn. Óıtkeni olardyń úlgi-ónege alatyn, jol kórsetetin, neni oqý kerek ekenin úıretetin rýhanı ustazdary joq. Bizdiń qoǵamda shákirt tárbıeleý úrdisi joıylyp ketti. Búgingi aqyn-jazýshylarymyzdyń kóbisi, ásirese, álem ádebıetin jalpylama oqyǵan. Mynaý biledi dep, kókke kóterip júrgen jastarymyzdyń kópshiligi - ınternetten birdeńeni shala-pula sholyp, bilgishsinip júrgen «danyshpandar». Uly ádebıettiń ne ekenin bilmegendikten tarıhty nemese dindi ádebıettiń «predmetine» aınaldyrǵysy kelip, ónerdiń jolynan adasyp, ózgelerdi de shatastyryp, jalǵan óner jasap júrgen aqyn-jazýshylarymyz qanshama. Tarıhı tulǵalardy jappaı maqtaýdy kórkem shyǵarmashylyqqa aınaldyrýdyń kózdegen maqsatyn túsine almaı-aq qoıdym. Sizder uqsańyzdar, túsindirip berińizdershi, maǵan. Eń bolmaǵanda bir ýaqyt Eýropa ádebıetine nazar salyp, tarıhı janrdyń ne sebepten tyǵyryqqa tirelgeniniń sebebin tarazylasaq ta kóp nárseni túsiner edik-aý. Áıtpese, Shekspır nemese Gúgolardyń tarıhı tulǵalardy asyra dáriptep drama nemese roman jazýǵa oı-óresi jetpedi dep oılaısyz ba? Bizdiń búgingi ádebıetimizdiń bet alǵan baǵyty «Bilme jáne bilgenniń tilin alma» bolyp bara jatqan joq pa osy. Taıaýda óte talantty synshy aǵam Tursynjan Shapaımen áńgimeleskenimde ol maǵan «ózin-ózi jarnamalaý bizdiń ulttyq ıdeıamyzǵa aınaldy» degen bolatyn. Shynynda da biz ózimizdi tym keremet áýlıe sanaıtyn aýrýǵa shaldyǵyp qalǵan joqpyz ba, osy.

(Amangeldi Myrzabektiń feısbýktegi paraqshasynan)