Búgin Memleket jáne qoǵam qaıratkeri Altynbek Sársenbaıulyn Almatydaǵy Keńsaı qabirstanynda jaqyndary, shákirtteri eske aldy, dep jazady Qamshy.kz tilshisi.

Qabir basyna quran baǵyshtaýǵa onyń qyzmettes dostary, saıasatkerler Tólegen Júkeev, Oraz Jandosov, Ámirjan Qosanov jáne týystary, jýrnalıser keldi. Qurannan keıin qonaqasynda ystyq estelikter, jyly tilekter aıtyldy.

Osydan 12 jyl buryn opozısıalyq saıasatker Altynbek Sársenbaıuly arnaıy uıymdastyrylǵan qastandyqtyń qurbany bolǵan edi. Onymen birge kómekshileri Baýyrjan Baıbosyn jáne Vasılıı Jýravlev te atyldy.

Bas prokýratýranyń málimdemesine sáıkes kezinde Altynbek Sársenbaıulyn óltirý jónindegi tapsyrysty oryndaǵany úshin aıypty dep tanylǵan Rýstam Ibragımbekov 2012 jylǵy sáýirde Qazaqstannyń Joǵarǵy sotyna qaıta aryz jazyp, «qastandyqqa tapsyrys berýshiniń shyn esimin» jarıa etken.

2013 jyly jeltoqsannyń 20-sy kúni Qazaqstan bas prokýratýrasynyń ókili Astanada arnaıy brıfıń ótkizip, «Altynbek Sársenbaıulyn óltirýge tapsyrys berýshi Erjan Ótembaev emes, Rahat Álıev pen Álnur Musaev» degen málimdeme jasady. Erjan Ótembaev 2006-shy jyly saıasatker Altynbek Sársenbaıulyn óltirýge tapsyrys berdi degen aıyppen 20 jylǵa sottalǵan bolatyn, keıinnen onyń jazasy eki ret jeńildetilip, bosap shyqty. Qylmysqa aıypty dep tanylǵan, UKQ eks basshylary, syrttaı sottalǵan Rahat Álıev 2015 jyly 24 aqpan kúni Avstrıa túrmesinde jumbaq jaǵdaıda qaıtys boldy. Óliminiń sebebi retinde ózine qol jumsaǵany aıtyldy; Álnur Musaev bolsa Eýropada bostandyqta júr.

Altynbek Sársenbaıuly – 1993-inshi jyldan bastap Qazaqstannyń baspasóz jáne buqaralyq aqparat mınıstri, aqparat jáne qoǵamdyq kelisim mınıstri, mádenıet, aqparat jáne qoǵamdyq kelisim mınıstri, 2001-inshi jyldan Ulttyq qaýipsizdik Keńesiniń hatshysy, Qazaqstannyń Reseıdegi tótenshe jáne ókiletti elshisi syndy laýazymdy memlekettik qyzmetterdi atqardy. Al 2003 jyldyń kúzinen bastap Altynbek Sársenbaıuly Qazaqstan opozısıasynyń qataryna qosylyp, «Aq jol» demokratıalyq partıasynyń teń tóraǵasy bolyp saılandy. 2004 jyly Qazaqstanda parlament saılaýy óter aldynda Altynbek Sársenbaıuly az ǵana merzimge aqparat mınıstri qyzmetine qaıta oraldy. Alaıda, sol jyly kúzde ótken parlament saılaýy zań talaptaryn óreskel burmalaýshylyqpen ótkizilgenin málimdep, oǵan narazylyq retinde mınıstr qyzmetinen ketti. 2005 jyldan opozısıalyq «Naǵyz Aq jol» partıasynyń teńtóraǵasy jáne «Ádiletti Qazaqstan úshin» respýblıkalyq qozǵalysynyń tóralqa múshesi boldy.