Jas aqyn Baltabek Nurǵalıev Qazaqstannyń birinshi hanymy Sara Nazarbaevaǵa arnap óleń jazdy dep jazady Qamshy.kz aqparat agenttigi. Búgin Sara Alpysqyzynyń týǵan kúni. Osyǵan oraı aqyn jyrdan shashý shashyp, feısbýk paraqshasyna jarıalaǵan.
Búgingi týǵan kún ıesi ardaqty Nazarbaeva Sara Alpysqyzy Apataıyma arnadym!!!
Keremet paıymyńyz – dara paıym,
Keremet paıymyńyz – dana paıym.
Týǵan kún qutty bolsyn deımin Sizge,
Anasy bar qazaqtyń – Sara Apaıym!
Basqaryp berekeli «Bóbek Qoryn»,
Sozdyńyz kóp jetimge kómek qolyn.
Panasyz balalarǵa pana bolyp,
Qamqorlap, qoldadyńyz, demep kóbin.
Aıtamyn Atyńyzdy aıbyn qylyp,
Dedińiz: «Adamshylyq – baı qundylyq».
Urpaqqa sińirdińiz ulaǵatty,
Bar elge jasadyńyz qaıyrymdylyq!
Berdińiz bolashaqqa tálim mándi,
Apataı, áýeleıdi ániń máńgi.
Zań baby jetimderdi qorǵaý jaıly,
Bir Sizdiń arqańyzda qabyldandy.
Ata-Ana alaqanyn armandap keń,
Zar-muńyn jetkize almas jalǵanǵa, átteń.
Jetimder – teń eken ǵoı – uqqan janǵa –
Qaraýsyz, qamqorlyqsyz qalǵan baqpen.
Qalmady Ana degen arman bolyp,
Qýandy kóp jetimder, aldan kórip.
Nur shashyp meıirimnen siz keldińiz,
Baptaýsyz qalǵan baqqa baǵban bolyp!!!
Jetimder – Jaratqannyń tylsym baǵy,
Ǵajaıyp – talshybyqtaı qulshynǵany.
Aınalmaı tasjúrekke, tasbaýyrǵa,
Barlyǵy meıirimnen sýsyndady.
Aıtýǵa boryshtymyz aıǵaqty biz,
Baqshadaı balalardy jaınattyńyz.
Barlyǵyn gúldendirip meıirimmen,
Baqyttyń bulbul qusyn saırattyńyz.
Táńirdiń tylsym baǵy – tastandylar,
Deıdi ǵoı: «Qatty bolar tastan bular».
Jerdegi jetimdermen birge jylar,
Jylatyp perishteler aspandy bar.
Apataı, júzińizde – ımanyńyz,
Kóbine kemel ómir syıladyńyz.
Jazylsyn saýap bolyp máńgilikke,
Kóz jasyn jetimderdiń tyıǵanyńyz.
Óskeni, órken jaıyp, arman-shybyq,
Eńbektiń jandanǵany aldan shyǵyp.
Men bilsem, Ana bolý degen uǵym –
Kıeli, qasıetti baǵbanshylyq!
Qaıda da izgilikten izdep úndi,
Dedińiz: «Úmit deıtin úzbe gúldi!».
Bar qazaq baq qaraıtyn baǵbandyqta,
Alsa ǵoı árqashanda Sizden úlgi!
Bolmaıdy eshkimniń de bir talasy,
Shynaıy shabytymnyń shyrqamasy.
Ardaqty, asyl tulǵa – Sara apaıym
Ózińiz - el anasy, ult anasy.
Júrekten tilep júrsiz el esenin,
Júrekten tilep júrsiz jer esenin.
«Ózińdi óziń tany» dedińiz ǵoı,
Urpaqtyń oılaǵan soń keleshegin!
Baqyttyń baý-baqshasy búrleý úshin,
Shattyqtyń jemisteri gúldeý úshin.
Saldyńyz «Úmit úıler» jetimderge,
Úmitke bolashaqty úndeý úshin.
Qalǵanda jarymjandar talyp-synyp,
Tartqanda baý-baqshalar ǵaripshilik.
Barlyǵyn nurly sózben jubattyńyz,
Túnekti jaryq kúndeı jaryp shyǵyp!
Jaratqan jandy bulaı keń ete me?
Barshany bastadyńyz berekege.
Peılińiz – peılindeı ǵoı perishteniń,
Ómirdi bóledińiz merekege.
Oı oılap «Bir Jaratqan qoldasyn!» dep,
Oı oılap «Tek Jaqsylyq ornasyn!» dep.
Senesiz keleshekke – kerim kúnge,
Kelesiz «Úmit gúli solmasyn!» dep.
Nazaryn kúlli ǵalam túrsin deımin,
Baqshalar bal-bul jaınap, kúlsin deımin.
Álemdi anasyndaı áldılegen,
Meıirim padıshasyn bilsin deımin!
Uǵynyp Áljan Áje ósıetin,
Uǵynyp Ábish Baba ósıetin.
Kelin bop, kórgendilik kórsettińiz,
Sińirip Tektiliktiń qasıetin!!!
Bolmady Jaratqannyń baǵy muńdy,
Bolmady Bolashaqtyń tańy muńdy.
Tektilik tanyttyńyz siz de laıym,
Alǵan soń tektilerdiń taǵylymdy.
Boldyńyz meıirimdi bulaq tunyq,
Qaıyrym, qamqorlyqty qýat qylyp.
Shybyqtaı terbetilgen jetimderdiń,
Basynan sıpadyńyz, jylap turyp.
Bastaryn meıirimge ıdi qazaq,
Astaryn baý-baqshanyń túıdi qazaq.
Jobalar – «Bóbek Qory», «Úmit Úıi»,
Shýaǵyn júregime quıdy ǵajap!
Meıirim – Alla bergen ǵalamatym,
Boldyńyz meıirimdi balaǵa tym.
Qurmettep Ábish Baba ónegesin,
Qurmettep Áljan Áje amanatyn!
Jón bolmas, bile tura, úndemeýim,
Jón bolmas, kóre tura, úndemeýim.
Kýá bop, kórdi barsha qazaq halqy,
Búr jaryp, talaı baqtyń gúldegenin.
Apataı, sizdiń saýap – Sara saýap,
Búginde eńbegińiz – tamasha baq.
Túzý qyp ósirdińiz kóp jetimdi,
Jolynan qısyqtyqtyń arashalap!
Jaraly óskinderdi túlettińiz,
Tas emes, barlyǵyn da gúl ettińiz.
Saýaby juldyzdan kóp Sara apaıym,
Ózińiz – gúldeı kórkem júrektimiz!
Bir Sizge bar jaqsyny tilek etem,
Baqshalar jaıqalyp tur, mine, bekem.
Tasty da jaryp shyǵar meıirimmen,
Gúl júrek gúldiń syryn biledi eken.
Keremet paıymyńyz – dara paıym,
Keremet paıymyńyz – dana paıym.
Týǵan kún qutty bolsyn deımin Sizge,
Anasy bar qazaqtyń – Sara Apaıym!
Baltabek Nurǵalıev buǵan deıin «Úrimi úzbesinshi ústemdigin», (Nazarbaevtar áýletine arnaý), «Ánindeı Ábik áke ádilettiń», «Nemeresi ájeniń Áljandaıyn», «Dana qyzy qazaqtyń-Darıǵasy» atty týyndylaryn jarıalaǵan. Sonymen qatar, ol Qazaqstan monarhıalyq basqarý formasyna kóshý kerek degen ustanymymen áleýmettik jelide tanylǵan.
